Diretór Downstream Autoridade Nasionál Petróleu no Minerál (ANPM), Nelson de Jesus. Imajen/Florencio Miranda Ximenes.

DILI, 11 novembru 2019 (TATOLI) – Diretór Diresaun Downstream Autoridade Nasionál Petróleu no Minerál (ANPM), Nelson de Jesus dehan bandu negosiante sira fa’an kombustivel iha dalan ninin tanba fó risku ba inséndiu no kontra ona lisensa harii tuir lei postu abastesimentu kombustivel.

“Ami só regula atividade kombustivel sira ne’ebé harii própriu no harii hanesan postu abastesimentu kombustivel. Enkuantu sira ne’ebé fa’an iha dalan ninin ne’e, ita la autoriza, maibé kompeténsia ministériu seluk ne’ebé haree ba tata kota nian”, Diretór Nelson iha Tower Bar, Fatuhada, ohin.

Nelson rekoñese negosiante balun fa’an hela kombustivel iha dalan ninin tanba nesesidade ekonomia.

“Ita tenta hateten ona ba sira katak ida ne’e laloos no hakarak fa’an kombustivel tenke harii postu abastesimentu kombustivel. Ami haree sira fa’an tanba iha ema sosa, se ema ne’ebé hakarak hasai osan para hetan mina ho kuantidade loos ho kualidade loos nia fatin mak postu abastesimentu kombustivel sira”, nia fó hanoin.

ANPM mós la fó lisensiamentu ba negosiante sira ne’ebé fa’an kombustivel iha dada ninin tanba prosesu hetan lisensiamentu ne’e rigorozu uitoan.

“Ami la fó lisensa ba ema atu fa’an iha dalan, maibé fó lisensa ba ema ne’ebé iha fatin própriu ka postu abastesimentu”, katak.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here