Diretór Diresaun Downstream, Autoridade Nasionál Petróleu no Minerál (ANPM), Nelson de Jeaus, disemina planu ba lansamentu sistema eletróniku ba kompañia importadór petróleu no minerál hamutuk 41. Imajen/Florencio Miranda Ximenes.

DILI, 11 novembru 2019 (TATOLI) – Diretór Diresaun Downstream Autoridade Nasionál Petróleu no Minerál (ANPM), Nelson de Jesus, hatete ANPM konvida kompañia importadór kombustivel hamutuk 41 hodi disemina planu lansamentu ba lisensiamentu liuhusi sistema aplikasaun eletrónika ka online ba atividade komersializasaun kombustivel iha Timor-Leste laran tomak.

“Ohin, ANPM konvida operadór sira ne’ebé hala’o atividade importasaun petróleu no minerál tanba ami hakarak disemina sistema eletróniku ba prosesu lisensiamentu no prosesu aprovasaun ba atividade importasaun nian”, Diretór Nelson de Jesus ba jornalista sira iha Tower Bar, Fatuhada.

Nelson dehan diseminasaun ne’e importante tebes atu kompañia importadór bele hatene sistema eletróniku ida ne’e.

“Sistema aplikasaun eletrónika ka online ne’e ita planu lansa iha fulan-dezembru tinan ne’e (2019) atu fasilita Kompañia sira ne’ebé hakarak hatama aplikasaun ba negósiu liuliu atividade importasaun petróleu no minerál”, katak.

Nune’e nia dehan, antes hala’o lansamentu konsulta ho Kompañia sira atubele hadi’ak liután sistema eletróniku ne’e hodi uza ho fasil no efetivu.

Importánsia husi sistema ne’e, Diretór Diresaun Downstream ne’e adianta ho sistema eletróniku ne’e bele redús ona tempu no gastu ba empreza sira lori dokumentu sira bá to’o edifísiu ANPM nian, maibé liuhusi sistema eletróniku ne’e, hafoin ANPM avalia no aprova hodi fó lisensa.

“Ho ita-nia sistema ne’e kompañia sira bele iha fatin de’it, maibé haruka aplikasaun negósiu husi online ne’e rasik, notifika katak empreza sira-nia dokumentu kompletu ona ne’e ami bele aprova no emite lisensa no emite sira atu halo atividade importasaun”, afirma.

Planu estratéjiku ANPM hahú tinan ne’e (2019) to’o 2023 ema hotu-hotu ne’ebé hakarak hala’o negósiu ka atividade iha setór petróleu no minerál sei uza hotu sistema online liuliu hatama aplikasaun iha setór importasaun petróleu no minerál.

“Agora daudaun ne’e, ami tenta ho kompañia 41 ida ne’ebé hala’o atividade importasaun kombustivel ne’e kompostu husi Gazolina, Gazóleu, mina aviaun no lubrikante sira no mós alkatraun”, nia salienta.

Iha sistema eletróniku online ne’e iha aplikasaun rua hanesan atu hetan lisensa no atu hala’o atividade.

Sistema ida ne’e, hanesan parte dahuluk husi lisensa sira seluk ne’ebé ANPM sei halo hodi fasilita operadór ka kompañia sira ne’ebé hala’o atividade negósiu iha parte downstream nian.

Atu hetan lisensa ne’e, empreza ne’ebé kandidata ba tenke rejistu iha SERVE, estatutu kompañia no planu kompañia halo importasaun tinan ida no produtu ne’e mai husi nasaun ne’ebé no produtu saida mak sira hakarak importa mai Timor-Leste.

“Husi ne’e mak ami halo prosesu no emite lisensa no kontinua kontrolu ba kualidade no kuantidade kombustivel ba Kompañia sira ne’ebé halo importasaun ba petróleu no minerál de’it”, katak.

Nia dehan, iha diseminasaun ne’e Kompañia importadór maioria apoia tanba fasilita tebes sira liuliu la halo ona relatóriu anuál, maibé ANPM hakarak asesu kada empreza nia relatóriu bele imprime sai husi sistema ne’e.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here