Prezidente Konsellu Veteranu RAEOA, Martinho da Cunha. Imajen TATOLI/Cipriano Colo

DILI, 10 novembru 2019 (TATOLI)–Veteranu Rejiaun Administrativa Espesiál Oé-Cusse Ambeno (RAEOA) no Zona Ekonomia Espesiál Sosiál Merkadu (ZEESM), orgullu ho nomeasaun ba Prezidente Autoridade foun, José Luís Guterres no prontu atu serbisu hamutuk durante mandatu.

Prezidende Konsellu Veteranu RAEOA, Martinho da Cunha hateten veteranu Oé-Cusse simu Prezidente Autoridade foun ho liman rua atu lidera Oé-Cusse tanba iha esperiénsia barak iha ukun liuliu iha diplomasia.

“Ami kontente no konkorda ho nomeasaun ne’e, tanba José Luís hanesan timoroan ida no lutadór ida. Ami mós la dúvida ho nia kapasidade jestaun tanba uluk hanesan reprezentante Frente Klandestina nian iha rai li’ur, hanesan Ministru Negósiu Estranjeiru no Kooperasaun, hanesan Vise Primeiru-Ministru. Ida-ne’e ami konsidera hanesan Governu nomea ema la sala no ami prontu serbisu hamutuk hodi dezenvolve Oé-Cusse sai nabilan liután”, Martinho dehan iha Manleuana, Dili, ohin.

Kona-ba ekipa ne’ebé sei prenxe sekretáriu rejionál sira, veteranu ne’e sujere atu koloka Oé-Cusse oan sira ne’ebé iha kapasidade ba área hirak ne’e.

“Iha tempu badak, ami sei marka audiénsia ho Prezidente Autoridade foun hodi haree mós ba asuntu ne’e, molok formasaun atu kompleta estrutura RAEOA”, nia hateten.

Parte veteranu Oé-Cusse mós planeia ona atu halo preparasaun hodi simu Prezidente RAEOA foun tuir kultura povu Atoni.

Nune’e mós, veteranu Constâncio Suni via telefonema ba TATOLI, ohin, informa, nu’udár veteranu Oé-Cusse sira kontente no aseita ho Governu ne’ebé nomea José Luís Guterres hanesan diplomata ida durante tempu rezisténsia to’o independénsia.

“Ami veteranu RAEOA kontente, tanba José Luís mós iha esperiénsia barak iha ukun, iha área diplomasia no iha Governu. Nia mós hanesan diplomata ida merese atu substitui Prezidente Autoridade sesante, Marí Alkatiri, tanba ZEESM ne’e mós presiza ema ne’ebé iha esperiénsia no bele halo diplomasia”, nia haklaken.

Constâncio mós fiar José Luís ninia simplisidade ne’ebé sei serbisu hakuak ema hotu, haree mós esperiénsia ukun dezde uluk to’o agora.

“Ami akompaña José Luís dezde uluk, ema ne’e simples no serbisu hakuak ema hotu no nia integra-aan iha Governu hotu. Ida-ne’e hatudu katak nia figura ne’ebé di’ak tebes. Ami mós akompaña José Luís ninia komentáriu sira katak nia sei mai atu serbí Oé-Cusse, sei konsidera mós tradisaun Atóni. Ami fiar ida-ne’e no iha esperansa katak nia mai sei rezolve problema barak no halo dezenvolvimentu ne’ebé di’akliu”, Constâncio tenik.

Preferénsia ba sekretáriu sira ne’ebé sei serbisu hamutuk iha RAEOA, Constâncio hateten, Prezidente Autoridade foun iha kompeténsia atu fihir ema ne’ebé merese atu serbisu hamutuk, maibé tenke envolve mós veteranu sira tanba ida-ne’e mós hanesan xave ida ba susesu iha Oé-Cusse.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here