Sekretáriu Estadu Komunikasaun Sosiál, Merício Juvenal dos Reis Akara. Imajen /Tatoli

DILI, 09 novembru 2019 (TATOLI)-Loron hirak ikus ne’e Timor-oan hotu akompaña publikasaun barak iha media, tantu media sosiál, imprensa, online inklui televizaun sira, fó sai informasaun sira tuituir malu kona-ba “foos falsu ka foos la kualidade”. Informasaun hirak ne’e sai tiha trending topic no halo públiku preokupa ba informasaun hirak ne’e nia verasidade.

Hafoin fó sai iha rede sosiál, instituisaun ne’ebé toma konta ba Inspesaun no Fiskalizasaun ba Atividade Ekonómika, Sanitaria no Alimentár (AIFAESA, I.P), halo ona intervensaun liuhosi foti amostra (sampel) atu halo teste. Maske, rekoñese katak sidauk iha kondisaun laboratóriu atu halo teste, maibé AIFAESA nu’udar instituisaun responsavel sei halo esforsu hotu atu buka meius ba halo teste hodi hatene loloos foos nia kualidade.

Liuhosi komunikadu imprensa ne’ebé Ajénsia TATOLI simu, sábadu (09/11/2019), Sekretáriu Estadu ba Komunikasaun Sosiál (SEKOMS) akompaña ho didi’ak publikasaun hirak ne’e no preokupa ba situasaun ne’ebé akontese daudaun. Maske nune’e, fiar katak instituisaun ne’ebé responsavel ba kontrolu hanesan AIFAESA no instituisaun relevante ka Ministériu relevante sira sei buka posibilidade hotu-hotu atu fó resposta loloos ba públiku kona-ba preokupasaun kualidade foos nian.

“Ita hotu akompaña informasaun sira ne’e, ita hotu preokupa. Maibé, di’ak tanba AIFAESA halo ona intervensaun hodi foti sample, maske sira rasik rekoñese katak sidauk iha kondisaun sufisiente, liu-liu laboratóriu atu halo teste, maibé ita fiar katak sira sei buka meius liuhosi kooperasaun ruma ka intervensaun imediatu hosi ministériu relevante hodi halo teste nune’e bele hatene foos hirak ne’e nia kualidade,” hateten Sekretáriu Estadu Komunikasaun Sosiál, Merício Juvinal dos Reis “Akara” iha komunikadu ne’e.

Maske rekoñese katak nasaun enfrenta hela limitasaun oin-oin hanesan ekipamentu kontrolu, sistema kontrolu ne’ebé presiza rigorozu liu tan, maibé Governu sei la para. Tuir Merício Akara, Governu sei kontinua tau matan no mellora ekipamentu hirak ne’e liuhosi orsamentu annual iha liña ministeriais sira.

“Ita tenke onestu katak ho limitasaun ba fasilidade no ekipamentu sira, susar tebes atu deteta ho lalais ba problema sira hanesan ne’e. Maibé, ita kompromete atu halo esforsu hotu-hotu liuhosi koordenasaun sektorial, hodi asegura kualidade foos no ai-han sira seluk, liu-liu kontinua esforsu atu asegura katak foos sira ne’ebé importadu iha kualidade di’ak nune’e la prejudika ita nia populasaun sira nia saúde,” afirma Merício Akara.

Relasiona ho kondisaun laboratóriu, Merício Akara klarifika no fiar katak Ministériu relevante sira tau ona orsamentu hodi bele rezolve iha tinan oin hodi hatán ba preokupasaun sira ne’ebé instituisaun sira hasoru, liu-liu ba públiku ein-jerál hodi garante kualidade ai-han ba sidadaun sira hotu.

Komunikadu Imprensa

Edisaun : Francisco Simões

HAKEREK NO HATÁN

Please enter your comment!
Please enter your name here