Kultura tarabandu hanesan meiu ida hosi justisa tradisionál.Imajen/Antonio Goncalves

VIQUEQUE, 08 novembru 2019 (TATOLI) – Xefe Suku Matahoi, Antonio Amaral ho Xefe Suku Afaloikai, Constantino Guterres, husu ba Prezidente Tribunal Rekursu (PTR), Deolindo dos Santos, atu halo esfisu ho kbiit autór judisiáriu sira hotu para prosesa lalais kazu pendente 4.000 iha tribunal sira.

Notísia Relevante : MRLAP Halo Konsulta Públiku Lei Kostumeiru iha Viqueque

“Ha’u rona informasaun hosi Asesór Jurídiku Sósiu Kultura Ministériu Reforma Lejizlativa no asuntu Parlamenteres (MRLAP) , Josh Trindade, hateten katak, kazu sivíl pendente iha Tribunal kontinua rejista aas ho total 1.000 no kazu krime ho total 3.000. ida ne’e, dezastre boot ba ita nia sistema justisa formal tanba budu kazu bar-barak,” hateten Xefe Suku Matahoi, Postu Administrativu Uatolari, Munisípiu Viqeuque, kinta (07/11/2019), bainhira partisipa iha konsulta públiku Lei Kostumeiru ho Justisa Tradisionál ne’ebé hala’o hosi ekipa jurídiku MRLAP nian iha Administrasuan Munisípiu Viqueque.

Tuir Xefe Suku Antonio Amaral ho Xefe Suku Constantino Guterres,  dalan di’ak atu kolabora redús lalais kazu pendente kontinua rejista as iha Tribunal sira mak fó kbiit ba justisa tradisionál atu autoridade sira iha Suku laran ou iha étnika ida-idak nian bele rezolve kazu sivíl sira liuhosi mediasaun.

Xefe Suku Constantino Guterres, informa, kazu krime todan sira bele atua tuir justisa formal, maibé kazu simples sira, hanesan la’en basa fen ou kazu disputa rai sira bele rezolve tuir justisa tradisionál. Importante, tuir Constantino Guterres, Estadu tenke kria deliberasaun tuir Lei atu fó kompeténsia ba autoridade sira rezolve kazu simples sira iha bairru laran no iha suku laran.

“Se buat hot-hotu direita ba hotu Tribunal konsidera di’ak, maibé ninia dezvantajen mak komunidade sira haree malu la mós mak konsidera kazu krime ka sivíl la hotu. Tamba nee, lalika hanoin katak diak liu buka solusaun ida ne’ebé diak liu iha baze atu nune’e bele haforsa serbisu juis,”  hateten Constantino Guterres.

Agradese MRLAP

Liuhosi konsultasaun públiku Lei Kostumieru ho Justisa Tradisional iha Administrasaun Postu Uatolari, Xefe Suku Matahoi, Antonio Amaral, hato’o sira nia agradesimentu boot tebes ba Governu liuhosi MRLAP tanba bele fó oportunidade ba povu iha baze atu envolve iha diskusaun ba elaborasaun lei justisa tradisionál.

“Ha’u hanoin kazu ne’ebé mak kontinua akontese iha suku laran mak kazu violénsia doméstika, violasaun sexual hasoru maioridade no disputa rai. Dala ida tan, ami agradese ba MRLP tanba bele mai introdús ami nia maneira justisa tradisionál molok konklui Lei própriu ba  lala’ok justisa formal nian,” Xefe Suku Antonio Amaral hateten.

Antonio esplika liu tan, dala balun mosu kazu no disputa entre komunidade ou violénsia doméstika entre la’en baku fen, maibé autoridade lokál buka halo mediasaun no rezolve tuir maneira ne’ebé iha. Mezmu nune’e, iha difikuldade tanba desizaun sira ne’ebé foti hodi solusiona problema la iha baze legal.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here