Reprezentante Organizasaun Saúde Mundiál (OMS) iha Timor-Leste, Rajesh Pandav. Imajen: Felicidade

DILI, 08 novembru 2019 (TATOLI)—Reprezentante Organizasaun Saúde Mundiál (OMS) iha Timor-Leste, Rajesh Pandav, hateten tuir estatutu indikadór katak sistema saúde Timor-Leste iha ona progresu di’ak hodi hatuur sistema no prosesu ida ba prevensaun no kontrolu moras la hada’et no ameasa husi moras sira seluk.

“Estatutu indikadór saúde iha Timor-Leste mós aumenta di’ak. Tan iha tinan hirak foin lalais ne’e, ida ne’e di’ak liu fali médiu rejionál nian,” dehan Reprezentante OMS iha Timor-Leste, Rajesh Pandav, bainhira hato’o nia diskursu iha lansamentu livru “Estratejia Finansiamentu Saúde Ba Timor-Leste Tinan-2019 to’o Tinan-2023” iha Salaun José Casmiro Universidade da paz (UNPAZ), Manleu, Dili, sesta (08/11/2019).

Maibé, nia hatutan, sei iha dezafius barak presiza haforsa liután serbisu ba kobertura saúde, hadi’ak kualidade ba tratamentu, responde ba inekuidade no hadi’ak liután efisiénsia iha serbisu saúde nian.

“Ita presiza serbisu hodi halo ita nia kuadru polítika no prestasaun serbisu aliña ho dezafiu sira no realidade ohin loron nian,” nia dehan.

Nia dehan tan, xave importante ba sistema saúde ne’ebé forte no reziliente mak kuadru finansiamentu saúde ne’ebé efikás no sustentável. Tanba ne’e, tenke uza maneira oinsá finansiamentu ba tratamentu saúde ne’e bele fó implikasaun boot iha sistema prestasaun saúde no ikus liu rezultadu husi populasaun sira-nia saúde.

Reprezentante OMS iha Timor-Leste ne’e hateten, xave forte husi Timor-Leste nia sistema finansiamentu saúde ne’e tanba governu nia partisipasaun boot no domina iha tratamentu saúde gratuita iha fatin tratamentu no gastus privadu ne’ebé kiik.

Iha Timor-Leste, nia haktuir, Timor-Leste mós atualiza no implementa  Pakote Serbisu esensiál ba Kuidadu Saúde Primária (KSP) ne’ebé maka sei haforsa liután prestasaun serbisu no sidadaun nia direitu ba tratamentu saúde hirak ne’e.

Nia haklaken, iha dezafiu lubun balun hanesan  finansiamentu públiku no espasu fiskál presiza atu kontinua hodi bele akomoda rekerimentu rekursu ne’ebé aumenta iha setór saúde presiza haforsa liután jestaun ba finansiamentu públiku. Iha setór saúde, jestaun finansiamentu hala’o liu husi planeamentu, ezekusaun no relatóriu ne’ebé di’ak liu hodi responde ba inefikás no inekidade, presiza atu jere ho efetivu liu kona-ba risku no oportunidade ba desentralizasaun.

“Ita hotu hatene katak Timor-Leste sei presiza barak liután. La’os de’it aumenta rekursu finansiamentu ba saúde maibé presiza mós hadi’ak maneira oinsá mobiliza rekursu, alokasaun no gastus atu bele mantein valór másimu ba osan hodi bele garanti finansiamentu ne’ebé justu no sustentavel no protesaun finansiamentu ba sidadaun hotu,” nia hateten.

Progresu iha estratejia finansiamentu ba saúde Timor-Leste, nia esplika, sai ona hanesan prosesu ida ne’ebé maka rigorozu no di’ak tebes hafoin kria estratejia ne’e. Timor-Leste halo ona diagnostiku ba sistema finansiamentu saúde no xave analítiku finansiamentu ba saúde hanesan estudu Konta Nasionál ba Saúde ne’ebé mak hala’o tiha ona liuhusi konsultasaun ho Governu Timor-Leste.

“Ha’u-nia parabéns ba Governu ne’ebé mak atu lansa livru ‘Estratejia Finansiamentu Saúde Timor-Leste’ ba dahuluk no  estratejia ne’e deskreve foku no intervensaun hodi orienta nasaun ba Kobertura Saúde Universál ne’ebé ekitativa no iha kualidade liu husi finansiamentu ne’ebé sustentavel, aproveita hasa’e efisiensia no garante protesaun finansiál ba populasaun hotu-hotu,” nia dehan.

Nia hatutan, Governu iha kompromisu hodi haforsa estrutura ba planeamentu, orsamentu no jestaun finanseiru saúde implementa Pakote Servisu Esensiál ba Kuidadu Saúde Primária hodi introdús alokasaun rekursu bazeia ba dezempeñu avalia fila fali medidas tributária ba produtu hirak ne’ebé estraga ba saúde no hadi’ak kapasidade iha analíze no monitorizasaun ba finansiamentu saúde.

Organizasaun Mundiál Saúde (OMS), nia dehan, ho orgullu sai ona parseiru iha progresu ida ne’e no OMS sei kontinua fó apoiu ba Governu iha nia asaun hodi harii sistema finansiamentu saúde ne’ebé sustentavel. OMS mós agradese ba Parseria Uniaun Europeiu  hodi fornese suporta finansiál ba inisiativu hirak ne’e.

“Ita halo lansamentu no hahú ona implementasaun ba instrumentu importante hirak ba finansiamentu saúde. Ha’u hakarak apela ba parseiru no parte interesada sira hodi hamutuk foti asaun no inisiativu fó apoiu ba Governu hodi harii sistema finansiamentu saúde ne’ebé sustentavel ba Kobertura Saúde Universál iha Timor-Leste,” nia apela.

Notísia relevante:MS Lansa Livru Estratejia Finansiamentu Saúde 2019-2023

Jornalista: Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here