Alin Feto hatudu hela nia kratividade no talentu liu husi pinta ema no manu pombu iha parede iha area Bebora, Dili 5 Jullu 2019.Imajen/Antonio Goncalves

DILI, 08 novembru 2019 (TATOLI)-Jestór programa Projetu LEARN PNUD (Programa Nasaun Unida ba Dezenvolvimentu), Tito de Jesus Filipe da Costa hateten, feto la´ós de’it hanesan objetu ida maibé tenke fó fiar ba feto, kualker pozisaun hotu ne’ebé ita iha.

Jestór Programa Projetu LEARN PNUD (Programa Nasionál ba Dezenvolvimentu), Tito de Jesus Filipe da Costa. Imajen: Nelia Fernandes

“Iha istória eleisaun iha Timor-Leste, iha taxa partisipasaun entre feto ho mane la dook malu maibé bainhira iha pozisaun mane barak sempre okupa liu feto,” konsidera JestórTito de Jesus Filipe da Costa, iha diskursu ba enseramentu formasaun Jéneru no Abordajen Integradu Jeneru, iha Hotel Ramelau, ohin.

Formasaun ne’e, tuir jestór ne´e katak importante tebes ba programa eleitoral no sosiedade sivil sira hotu. “Iha vontade lubuk ida ho CNE no STAE, hanoin katak iha nesesidade ita atu bele hala’o programa íntegradu ida no formasaun integrada ida ne’ebé bele kobre STAE, CNE no mós sosiedade sivil sira”.

Jestór Tito Filipe haktuir, formadór ka matéria ne’ebé fó durante loron hirak ne’e, hanoin lá sufisiente para aprende no implementa kedas. “Maibé ita mós tenke konsiénsia katak, prosesu aprendijazen no prosesu ida implementa ne’e presiza tempu. Hanoin iha instituisaun, kartaun eleitorál no sosiedade sivil, hatene katak sei la mate. Iha ne’e eziste nafatin no fiar katak buras liután, espera iha futuru bele implementa”.

Nia hatutan, Projetu LEARN iha komprimisu bo’ot ida atu apoiu prosesu eleisaun munisípiu no mós desentralizasaun. “Ami hatene katak governu oras ne’e daudauk planeia bele konkretiza, ne’ebé tau ona iha Oitavu governu, liuliu iha programa tinan lima nian atu halo desentralizasaun no mós eleisaun, fazeadamente hahu husi 2021,” dehan Jestór Programa Projetu LEARN, PNUD, Tito Filipe.

Nia reforsa, iha tinan ne’e no oin fókus fó formasaun iha CNE (Komisaun Nasionál Eleisaun, sigla portugés).

“Ami fó importánsia ba CNE, tanba iha eleisaun nasionál no mós eleisaun jerál iha dadus hatudu katak, ita iha konta ne’ebé ita bele dehan katak 30% iha Parlamentu Nasionál, buat ida ita atinji 30% ne’e hanesan buat bain bain de’it tanba ei mak obriga, lei mak hateten, maibé bainhira ita atu halo esforsu ida, atu ultrapasa ba iha ida ne’ebé lei hateten, oras ne’e daudaun ita iha 40% no reprezentasaun feto iha Parlamentu Nasionál ne’e buat ida extraordinária,” nia konsidera.

Iha mapa Ásia Pasífiku, tuir Jestór Programa Projetu LEARN, Tito Filipe da Costa katak ita-nia prestasaun feto iha Parlamentu Nasionál bo’ot liu kompara ho nasaun seluk.

“Tanba ne’e ho UNDP nia naran liuliu projetu eleitorál UNDP, ami hamutuk ho ami-nia parseiru sira comitment (kompromisu) nafatin apoia CNE no STAE, sei hametin nafatin ita-nia komprimisiu ida ne’e atu bele alkansa ita-nia objetivu ida atu bele hetan taxa, la´ós taxa ba populasaun de’it, maibé reprezentasaun feto iha eleisaun munisipál tuir mai ho bo’ot liután”.

Iha oportunidade hanesan, Adjunta STAE (Sekretariadu Tékniku Administrasaun Eleitorál), Josefina Antonieta da Silva hateten, matéria durante loron rua hafanu nafatin, relembra katak feto mós bele simu iha aspetu ne’ebé de’it.

Adjunta STAE (Sekretariadu Tékniku Administrasaun Eleitorál), Josefina Antonieta da Silva. Imajen: Nelia Fernandes

Mane sira sai ba li´ur labele hanoin katak feto ne’e la iha valór, lae. Maibé, kuandu imi aprende iha matéria balun, fahe ba ita-boot sira (formandu) oinsá atu ko’alia kona-ba jéneru ho abordajen jéneru ba órgaun jestaun eleitorál liliu iha sosiedade sivil nian,”  hateten Adjunta STAE, Josefina Antonieta da Silva.

Nia dehan, parte ha’at; sosiedade sivil, STAE, CNE, hamutuk oinsa atu valoriza luta ba feto ninia prezensa iha aspetu saida de’it. “Aprende buat sira ne’e,atu valoriza feto ninia prezensa entre mane ho feto”.

Tuir Josefina Antonieta, formasaun iha loron rua nia laran formandu sira esforsu, boa vontade atu hatene objetivu husi formasaun ne’ebé formandu sira aprende no akompaña ona, komesa husi horseik (kinta) to’o ohin (sesta). Oportunidade seluk ba ema seluk atu hetan hanesan mós ita-bo’ot sira hetan durante loron rua.

“Ha’u atu hateten, ema ne’ebé atu fahe nia matenek mai ita ne’e ita-nia amigu, ha’u hanoin ekilibriu husi mane no feto, ita-boot sira hetan oportunidade hanesan atu aprende saída mak igualidade jéneru, ita atu hatur feto didi’ak atu signifika feto iha parte ne’ebé. Atu hateten, iha artigu barak horseik ha’u sita ona iha artigu 17 katak, iha aspetu ne’ebé de’it, ita sempre louva feto ne’e iha ninia fatin, la’ós katak feto ita dignifika ninia fatin no prezensa, la´ós katak ita atu sai ukun na’in”.

Adjunta STAE, Josefina Antonieta da Silva kompara, ko’alia uitoan ba kotuk sistema monarkia nunka fó valoriza feto nia dignidade; feto sempre iha kotuk, feto la tau iha oin.

Agora imposivel, ajénsia internasional fó ona tempu ba ita materia barak formandu sira hetan durante loron rua, fila fali ba instituisaun atu fahe, bele valoriza ita-nia aan, ita koloka ita-nia aan katak, feto-nia funsaun iha parte ne’ebé de’it.

“Saída feto bele halo iha aspetu saida de’it, iha Parlamentu, iha Membru Governu feto iha ona. Iha funsionáriu públiku feto iha, diretór jerál feto iha, diretór nasionál, xefe departamentu no seluk,” nia rekoñese.

Adjunta Josefina reforsa: “Ha’u husu nafatin ita-boot sira-nia konsiénsia, bainhira mane aprende mós saída mak Igualidade Jeneru, fila fali ba ita-boot sira-nia instituisaun rasik, aprende buat sira ne’e atu bele pasa informasaun, labele dignifika feto ne’e iha parte ida de’it”.

Notísia relevante:UNDP Fasilita Formasaun Abordajen Integradu Jéneru

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here