Embaixadór Uniaun Europeia iha Timor-Leste, Andrew Jacobs. Imajen/rnz.co.nz

DILI, 08 novembru 2019 (TATOLI) – Embaxadór Uniaun Europeia (UE) iha Timor-Leste, Andrew Jacobs, hala’o sorumutuk ho Primeiru-Ministru, Taur Matan Ruak hodi diskute kona-ba kooperasaun foun.

Akordu ikus asina entre parte rua iha loron 30 marsu 2017, hodi UE prevee asisténsia hamutuk millaun €61,3 ba tinan lima ba oin.

“Ha’u ho Primeiru-Ministru ko’alia kona-ba dezenvolvimentu, fundu no desentralizasaun. Tanba Uniaun Europeia sei haree atu servisu ho Governu no timoran sira. Ami nia kooperasaun ida agora sei ramata iha 2020 no ami sei iha kooperasaun foun ba períodu 2021 to’o 2026”, nia tenik iha Palásiu Governu, sesta ne’e.

Tuir Andrew Jacobs, Timor-Leste no UE iha relasaun ne’ebé forte tanba iha ona dezenvolvimentu di’ak ba programa kooperasaun.

“Uniaun Europeia orgullu atu serbisu iha área dezenvolvimentu estrada no governasaun di’ak”, nia akresenta.

Embaixadór ne’e rekoñese nu’udar parseiru forte iha Organizasaun Nasaun Unida (ONU), parte rua ne’e trasa hamutuk relasaun multilaterál atu bele garante estadu diretu, tanba ne’e sei iha kooperasaun di’ak liután.

Nia informa, UE no Timor-Leste sei hahú halo programa foun hamutuk iha fulan tuir mai no sei implementa programa foun hahú iha 2021.

Kona-ba área ne’ebé sei trasa iha programa foun, nia dehan seidauk hatene maibé UE iha ona esperiensia di’ak ho Timor-Leste iha área nutrisaun, governasaun di’ak, no dezenvolvimentu estrada.

“Ami sei haree planu saida maka atu halo bainhira muda husi área ida. Ami tenke halo diskusaun ho Governu no sosiedade sivíl ne’ebé maka foku ba programa kooperasaun iha tinan oin”, Andrew Jacobs dehan tan.

Entretantu, programa hirak ne’ebé inklui iha akordu ne’ebé asina iha tinan hirak liubá maka foka iha reforsu jestaun no supervizaun finansa públika nian, nune’e iha parseria sustentável ba setór agroflorestál no silvikultura.

Inisiativa sira ne’ebé inklui iha programa agroflorestál dezenvolve liuhusi kooperasaun ne’ebé delega iha ajénsia Alemaña, GIZ no iha Organizasaun Internasionál Traballu, ne’ebé implementa iha Munisípiu Baucau, Covalima, Lautem, Manatuto, Manufahi no Viqueque.

Programa apoiu ba governasaun di’ak inklui ona komponente rua maka hanesan iha apoiu orsamentál diretu ba Ministériu Finansa no apoiu ida seluk hala’o liuhusi kooperasaun ne’ebé delega iha Camões – Institutu Kooperasaun no Lian nian, ne’ebé sei apoia instituisaun superiór sira ne’ebé hala’o knaar kontrolu hanesan iha Parlamentu Nasionál, Prokuradoria Jerál Repúblika, Câmara de Contas (CdC) no Polísia Sientífika Investigasaun Kriminál (PSIK), no sira seluk tan.

UE maka hanesan ida husi parseiru prinsipál lima kooperasaun internasionál iha Timor-Leste.

Hahú tinan 1999, apoiu ne’ebé fó ona ba Timor-Leste hamutuk millaun $300 resin.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here