Komandante FALINTIL Lere Anan Timur ho Komandante FALINTIL, Cornelio Gama "L7" konversa hela iha ámbitu enkontru Organizasaun Sagrada Família, sesta (08/11/2019). Imajen/Eugénio Pereira

DILI, 08 novembru 2019 (TATOLI)-Konselleiru Organizasaun Sagrada Família (OSF) atuál  Xefe Estadu Maiór Jenerál FALINTIL-FDTL, Majór Jenerál Lere Anan Timur, husu ba membru OSF hotu iha Timor-Leste atu kontinua kumu liman metin ho unidade luta kontribui di’ak liután ba dezenvolvimentu Timor-Leste.

Notísia Relevante :Iha Reuniaun OSF, Lere Deklara Preokupa ho Impase Polítika 

Lere dehan, OSF tenke hamutuk nafatin hanesan tempu rezisténsia sira hotu-hotu unidade ho hanoin ida, luta too ema rihun ne’ebé mate maka hetan independénsia.

“Ita hotu tenke hatudu dala ida tan atu kumu liman metin hamutuk ho unidade atu kontribui ba ita nia nasaun nia dezenvolvimentu,” hateten Lere Anan Timur iha abertura reuniaun OSF, ohin, ho tema “Konsolidasaun Kuadru (OSF) ba Daruak Hodi Hametin Pás Estabilidade Ho Dezenvolvimentu Nasionál” iha salaun Restaurante Vitória, Metiaut Dili.

Iha tempu rezisténsia OSF hasoru situasaun difisil sempre ajuda malu hodi kaer metin doutrina organizasaun nian, maibé depois Timor-Leste ukun aan, ikus-ikus ne’e membru OSF komesa fahe malu tanba de’it envolve-aan iha partidu polítiku sira  no dala ruma ema oportunista tama iha leet hodi sobu tiha organizasaun nia unidade.

“Ema oportunista ne’e maka ita nia inimigu boot liu maka sira. Agora ita ukun-aan ita dala ruma la fiar malu fali, haree malu oin buis ba malu hodi halo situasaun ida la di’ak no komesa sobu malu fali,” Lere afirma tan.

Lere dehan, organizasaun rezisténsia hotu-hotu ne’ebé harii iha tempu funu ne’e, harii hosi ema barak nia terus, too mate nu’udar lulik ba ema hotu-hotu atu merese respeita.

Komandante  F-FDTL fó lembra katak, iha tempu luta Timor-oan la hanoin atu buka osan ka pozisaun ruma, maibé hanoin maka oinsá lori nasaun Timor-Leste hetan ukun rasik-aan livre husi ukun kolonializmu.

Lere mós husu atu membru OSF kontinua hamutuk, mezmu Timor-Leste hasoru hela impase ne’ebé kria rasik hosi lider rezisténsia hanesan, Kay Rala Xanana Gusmão, Taur Matan Ruak no Francisco Guterres Lú Olo ne’ebé uluk terus no luta hamutuk agora fahe malu iha ideolojia polítika lakohi hamutuk hodi hatudu imajen la di’ak ba mundu.

“Ha’u bele dehan imi sagrada família mós fahe malu. Tanba saida? Osan no polítika mak halo imi, tanba ema filozofia sira dehan, osan ne’e diabu ida bele halo ita nia unidade fahe malu no osan sei estraga ema,” nia hatete.

Lere apela ba membru OSF atu rezolve problema interna organizasaun nian hodi kontinua halibur lista membru sira ne’ebé luta too mate atu entrega ba estadu atu rekoñese sira nia direitu tuir lei.

Iha fatin hanesan, Prezidente Organizasaun Sagrada Familia, Cornelio Gama “L7” dehan, OSF halo konsolidasaun ne’e hodi hametin liña koordenasaun membru sira hosi munisipiu 12 inklui RAEO hodi diskute planu no programa organizasaun nian.

OSF mós husu orientasaun ba koordenadór kada munisípiu atu rekolla dadus lista númeru membru sira hotu inklui rekolla membru sira ne’ebé mate durante funu nia laran.

L7 husu atu membru hotu-hotu kontinua hametin sira nia fiar no servisu hamutuk hodi lori organizasaun kontribui ba dezenvolvimentu Timor-Leste.

OSF harii iha tinan 1989 husi Saudozu Veteranu Rezisténsia Andre da Costa “L4” eziste tinan 30 ho nia misaun prinsipál organiza Timor-oan sira atu luta ba independénsia no hanorin dame no hadomi malu.

“Dezde tinan 1989 ami hotu halo juramentu katak, depois funu hotu ami tenke hamutuk konsolida malu para hamutuk nafatin atu kontribui rezolve problema nasaun nian liuhosi kontribuisaun servisu organizasaun sagrada família,” dehan L7.

L7 hatutan, liuhosi reuniaun ne’e alerta mós ba membru sira atu tuur hakmatek kria pás iha fatin hotu-hotu hodi kontribui ba nasaun.

Durante reuniaun, koordenadór OSF kada munisípiu mós  entrega lista naran membru sira ne’ebé mate durante funu tinan 24 no lista naran membru sira ne’ebé rekolla ona.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here