Diretór Ezekutivu CNC, Hugo Maria Fernandes ho Diretór Jerál MSSI, Rui Manuel Gago Expostu, asina MoU salaun konferensia MSSI, Cacoli, Dili, sesta (08/11/2019). Imajen/foti hosi kronolojia Facebook CNC

DILI, 08 novembru 2019 (TATOLI)-Ministériu Solidariedade Sosiál no Inkluzaun (MSSI) ho Centro Nasionál Chega (CNC), ohin,  asina memorandu entendimentu  (MoU-sigla Inglés)  kona-ba implementasaun rekomendasaun Chega no mós Relatóriu Per Memoriam Ad Spem ne’ebé iha ligasaun ho polítika iha Solidariedade ba Sobrevivente Vulneravel sira.

Notísia Relevante : Programa Prioridade CNC iha 2020 Halo Mapeamentu no Prepara Kondisaun ba Arkivu

Asinatura nota entendimentu ne’e reprezenta hosi Diretór Ezekutivu Centro Nasional Chega, Hugo Maria Fernandes ho Diretór Jerál Ministériu Solidariedade Sosiál no Inkluzaun (MSSI), Rui Manuel Gago Expostu iha salaun konferénsia MSSI, Caicoli, Dili.

Nota entendimentu ida ne’e nu’udar akordu kooperasaun ida ho prinsípiu solidariedade no justisa ne’ebé hatuur ho rekoñesimentu ba ema, família no komunidade ne’ebé nu’udar sobrevivente vítima pasadu funu libertasaun Timor-Leste hodi hetan tulun adekuadu ba sira nia moris, nune’e sira bele partisipa di’ak iha dezenvolvimentu nasionál.

Iha nota entendimentu ida ne’e husu ba parte rua atu dezeña no implementa atividade sira ne’ebé haktuir iha Rekomendasaun Chega no CVA ba setór solidariedade sosiál no inkluzaun iha ámbitu fortalesimentu institusionál no dezenvolve polítika no programa Ministériu Solidariedade Sosiál  no Inkluzaun nian hodi refere ba rekomendasaun rua ne’e.

Diretór Ezekutivu  CNC,  Hugo Fernandes hatete, mekanizmu ne’ebé daudaun ne’e Chega hala’o hela kooperasaun ho Asosiasaun Vítima Timor-Leste  ne’ebé akumula vítima hosi funu 1975-1999 hodi ajuda rejistu ba vítima sira.

“Chega distribui ona formuláriu  1000-resin ba  asosiasaun vítima sira hodi rejistu hafoin lori mai CNC hatama hodi analiza no verifika vítima ne’ebé merese hetan apoiu hosi estadu,” esplika Hugo Fernandes.

Hosi  rezultadu  verifikasaun ne’e, nia esplika, CNC dezenvolve baze dadus hodi rekomenda fali ba MSSI ho Ministériu Saúde kona-ba  saida mak sira bele  apoiu liu-liu tulun vítima veneravel, moras mental, trauma hodi bele hetan  apoiu no tratamentu.

Biban ne’e, Diretór Jerál MSSI, Rui Manuel Exposto hatete, aprofunda, akordu ne’e importante tebes hodi hametin liu tan kooperasaun servisu MSSI ho CNC atu haree kona-ba vítima afetadu iha funu hodi bele hetan atensaun hosi Estadu.

Tuir relatóriu Komisaun Akollamentu Verdade Rekonsiliasaun (CAVR-sigla portugés) timor-oan ne’ebé sofre no mate hosi okupasaun indonézia liu ema 100.000.

Notísia Relevante : CNC Presiza Kondisaun Tolu atu Lori Dokumentu Importante Hosi Estranjeiru

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here