Sesaun plenária Parlamentu Nasionál. Imajen dok. Tatoli

DILI, 08 novembru 2019 (TATOLI)—Ministériu balun husu tan orsamentu adisionál 2020 nian ba Parlamentu Nasionál (PN).

Vise-Prezidente Komisaun G trata asuntu Edukasaun, Juventude, Kultura no Sidadania, Sabino Soares ‘Guntur’ haktuir pedidu adisionál ne’e responsável ministériu relevante sira levanta liuhusi audiénsia ho Komisaun Parlamentár no nia dehan rezultadu audiénsia refere sei aprezenta ba Komisaun C (trata Asuntu Ekonomia no Finansa Públika) atu bele haree.

“Ba ha’u, ne’e laiha lójika no la rasionál. Governu ne’e órgaun ketak ida no Parlamentu mós órgaun ketak ida. Tanba saida mak sira husu fali mai Parlamentu. Parlamentu só haree proposta en-jerál. Orsamentu ne’e bele liu biliaun $2 resin ka bele redús ne’e kompeténsia Komisaun C nian”, Deputadu Guntur informa ba jornalista sira, iha resintu Parlamentu Nasionál, sesta ne’e.

Guntur preokupadu ho ministériu balun ne’ebé husu tan adisionál. Loloos ne’e, tuir nia, membru Governu husu ba Primeiru-Ministru iha reuniaun Konsellu-Ministru.

“Orsamentu agora bubu maka’as, tanba ne’e ita tenke haree sasán sira ho sensível depois analiza didi’ak kada kategoria, koloka tuir espasu ka lae, koloka tuir regra ka lae,” nia esplika.

Nia esplika, iha proposta adisionál haat mai hosi Ministériu Edukasaun, Juventude no Desportu, Ministériu Ensinu Superiór, Siénsia no Kultura, Sekretaria Estadu Juventude no Desportu, Sekretaria Estadu Arte no Kultura, Sekretaria Estadu Komunikasaun Sosiál, Universidade Nasionál Timor Lorosa’e (UNTL) no Institutu Politéknika Betano (IPB).

“Kona-ba totál orsamentu adisionál ne’e depois imi (jornalista) sei haree no akompaña diskusaun iha plenária”, Guntur katak.

Purtantu, Xefe Bankada Parlamentár CNRT, Duarte Nunes, hateten orsamentu adisionál ne’e oras ne’e sei iha komisaun ida-idak nian.

“Komisaun sira-ne’e sei fó sira-nia pareser. Ami hein iha plenária”, Xefe Bankada CNRT ne’e ba jornalista sira, iha Parlamentu Nasionál, sesta ne’e.

Entretantu, Vise-Xefe Bankada Parlamentár FRETILIN, Francisco Miranda Branco, haklaken katak sira sei haree didi’ak orsamentu adisionál ne’e.

“Ami sei haree hela. Ami sei lee, estuda no analiza para depois hasai desizaun iha plenária. La’ós hasai desizaun arbiru de’it, la bazeia ba dadus sira ne’ebé iha livru orsamentu”, Branco tenik.

Governu liuhosi Konsellu-Ministru aprova proposta orsamentu 2020 ho montante biliaun $1,950. Hosi montante orsamentu ne’e fahe ba kategoria saláriu no vensimentu millaun $241,271, bens no serbisu millaun $738,428, transferénsia públika millaun $457,773, kapitál menór millaun $53,267 no kapitál dezenvolvimentu millaun $459,260.

Ho orsamentu ne’ebé boot tebes, Segundu Vise-Prezidente Parlamentu Nasionál, Luís Roberto, hateten orsamentu 2020 besik ona biliaun-rua ona.

“Ami-nia komisaun B iha adisionál balun. Proposta atuál besik ona biliaun-rua. Agora husu tan adisionál. Karik aprova hotu bele liu biliaun rua resin. Tanba ne’e, ami hanesan reprezentante povu sei husu sira-nia razaun kona-ba aumentu liuhosi adisionál ne’e”, Luís Roberto hateten.

Tuir livru 1 kona-ba Panorama Orsamentál, alokasaun orsamentu ba kategoria Saláriu no Vensimentu (millaun $241.3), sa’e %12.6 iha 2020 kompara ho alokasaun ba kategoria orsamentu ida-ne’e iha OJE 2019. Ida-ne’e tanba kustu hosi mudansa iha estrutura tuir orgánika foun, rejime espesiál ba funsionáriu públiku no rekruitamentu foun.

Medida prinsipál hosi kategoria Saláriu no Vensimentu millaun $6.5 ba munisípiu hotu hodi kompleta pozisaun iha estrutura Governu lokál, millaun $2.0 ba Ministériu Finansa hodi selu nia funsionariu sira ne’ebé hetan rejime espesiál, millaun $1.6 ba Ministériu Negósiu Estranjeiru no Kooperasaun hodi rekruta joven diplomata foun, $936,000 ba F‐FDTL hodi halo rekrutamentu ba membru foun 600, $730,000 ba Komisaun Funsaun Públika ba promosaun interna ba funsionáriu sira. Aumentu ida-ne’e atu responde ba mudansa iha estrutura ne’ebe define ona iha orgánika foun ministériu no instituisaun Estadu sira liuhusi OJE 2020.

Daruak, alokasaun orsamentu Fundu Konsolidadu Timor-Leste (FKTL) ba kategória bens no serbisu millaun $703.7 ba tinan 2020, sa’e 55.4% kompara ho alokasaun orsamentu ba kategória ida-ne’e iha OJE 2019. Aumentu iha 2020 ne’e tanba atu hadi’a povu nia moris, alokasaun boot ba manutensaun no operasaun eletrisidade, no mós ba transporte públiku. Medida prinsipál bens no serbisu, millaun $173.9 iha Ministériu Obra Públika ba mina no manutensaun jeradór eletrisidade iha Hera no Betano inklui manutensaun ba transmisaun eletrisidade 150KW no sub‐estasaun 20KW, millaun $92.0 iha “Dotasaun ba Governu Tomak” ba fundu kontrapartida. Ida-nee atu kontinua implementa projetu kontrapartida sira inklui sosa ró atu halo patrullamentu iha fronteira marítima no sosa Ferry Nakroma II.

Nune’e mós, millaun $15.0 iha “Dotasaun ba Governu Tomak” ba serbisu legál, millaun $5.5 iha ”Doatasaun ba Governu Tomak” hodi selu dívida eletrisidade (EDTL), millaun $5.0 iha “Dotasaun ba Governu Tomak” ba serbisu aviasaun sivíl, millaun $5.0 iha “Dotasaun ba Governu Tomak” hodi selu ba kuota nu’udar membru ba instituisaun internasionál hodi kontinua asegura partisipasaun Timor‐Leste nian iha atividade nível rejionál no internasionál, millaun $4.9 ba SAMES atu sosa aimoruk no sasán farmásia nian hodi ajuda hadi’a kualidade serbisu saúde públiku iha territóriu tomak.

Millaun $3.5 ba Ministériu Obra Públika hodi finansia projetu bee no saneamentu iha área rurál no urbana, millaun $3.0 iha “Dotasaun ba Governu Tomak” ba sensu populasaun no uma-kain, millaun $2.7 ba Ministériu Finansa hodi suporta reforma Fiskál no Jestaun Finansa Públika, millaun $2.4 iha “Dotasaun Governu Tomak” ba eventu Internasionál no jogu CPLP nian iha Timor‐Leste, millaun $2.1 iha GPM ba partisipasaun Timor‐Leste iha expo Dubai, millaun $1.0 iha Ministériu Agrikultura no Peska ba transportasaun produtu lokál.

Hosi kategoria Bens no Serbisu ne’e, $600,000 ba Ministériu Ensinu Superiór, Siénsia no Kultura hodi kria konsiénsia nutrisaun, luta kontra ki’ak no diversifikasaun ambientál.

Datoluk, Transferénsia Públika kompostu hosi despeza Governu nian ba ajudu públiku no pagamentu ba kompromisu. Alokasaun ba kategoria ida-ne’e iha 2020 sei sa’e ba millaun $469.8, iha aumentu %29.5 kompara ho OJE 2019.

Medida Prinsipál hosi Transferénsia Públika, millaun $93.0 aloka iha Ministériu Asuntu Kombatante Libertasaun Nasionál ba pensaun veteranu no konstrusaun uma ba veteranu sira, millaun $70.0 ba Ministériu Administrasaun Estatál, millaun $50.0 aloka ba konstrusaun uma ba ema vulnerável sira, millaun $3.0 ba bee iha área rurál, millaun $15.0 ba Programa Nasionál Dezenvolvimentu Suku (PNDS), millaun $2.0 ba haki’ak balada, millaun $63.8 ba Ministériu Petróliu no Minerál hodi investe iha Timor‐Gap, millaun $40.2 aloka iha Institutu Nasionál Seguransa Sosiál (INSS) ba rejime seguransa sosiál kontributivu no la’ós kontributivu.

Nune’e mós, millaun $23.1 ba Ministériu Petróleu no Minerál hodi suporta Autoridade Nasionál Petróliu no Minerál (ANPM), Timor‐Gap no Institutu Petróliu no Jeolojia (IPG), millaun $21.6 aloka iha Ministériu Edukasaun, Juventude no Desportu hodi harii sala aula no harii eskola, millaun $17.2 iha “Dotasaun ba Governu Tomak” hodi selu pensaun ba funsionariu públiku permanente sira iha rejime kontributivu, millaun $11.3 iha Ministériu saúde ba tratamentu saúde iha rai‐li’ur, kuidadu saúde primária no subsídiu ba doutór Kubanu iha Timor‐Leste, millaun $11.0 iha ”Dotasaun ba Governu Tomak” ba kapitalizasaun BNCTL, millaun $10.2 iha “Dotasaun ba Governu Tomak” hodi selu empréstimu.

Millaun $10.0 iha “Dotasaun ba Governu Tomak” hodi suporta atividade Igreja liuhosi Konferénsia Episkopál, millaun $8.0 iha “Dotasaun ba Governu Tomak” ba programa diagnóstika saúde, millaun $7.2 iha Gabinete Primeiru -Ministru ba programa sosiedade sivíl. Ida-ne’e inklui apoia ba ONG sira no konfisaun relijioza seluk, millaun $7.0 iha “Dotasaun ba Governu Tomak” ba kapitalizasaun BCTL no atu selu sira-nia kustu serbisu ne’ebé fornese ba Governu, millaun $6.7 ba Ministériu Edukasaun, Juventude no Desportu hodi suporta eventu desportu no atividade juventude nian iha tinan tomak, millaun $6.0 ba pagamentu pensaun vitalísia.

Millaun $6.0 ba Komisaun Nasionál Eleisaun hodi fó subsídiu ba partidu polítiku sira atu kontinua hametin demokrasia iha Timor‐Leste, millaun $5.3 ba Ministériu Saúde hodi finansia programa konstrusaun klínika sira, millaun $3.0 iha ”Dotasaun ba Governu Tomak” ba apoiu fundu internasionál, millaun $2.6 ba SEFOPE hodi finansia programa auto‐empregu, millaun $2.5 ba Ministériu Ensinu Superiór, Siénsia no Kultura hodi suporta programa prezervasaun Uma-Lulik, millaun $2.0 ba Sekretáriu Estadu Kooperativa hodi fó subsídiu ba grupu kooperativa sira, millaun $1.9 iha Ministériu Edukasaun, Juventude no Desportu ba programa konsensaun eskolár (eskola privada) no eskola KAFE.

Millaun $1.9 iha Sekretaria Estadu Komunikasaun Sosiál ba subsídiu Rádiu Televizaun Timor‐Leste (RDTL) no Agência TATOLI, millaun $1.5 iha Sekretaria Estadu Juventude no Desportu ba programa KPK ne’ebé sei halo hamutuk ho Ministériu Interiór, millaun $1.5 ba Sekretaria Estadu Igualdade no Inkluzaun hodi fornese kapitál rotativa ba feto iha área rurál ho objetivu atu empodera ekonomia feto, millaun $1.5 iha ”Dotasaun ba Governu Tomak” ba Sekretariadu g7+, millaun $1.0 ba Ministériu Interiór hodi finansia programa asisténsia dezastre naturál no millaun $1.0 ba Ministériu Transporte no Komunikasaun hodi subsídia Autoridade Aviasaun Timor‐Leste.

Dahaat, despeza ba Kapitál Menór inklui ba veíkulu, mobiliáriu no ekipamentu móvel seluk. Orsamentu ba Kapitál Menór iha 2020 hamutuk millaun $53.2, iha aumentu %68.9 kompara ho alokasaun millaun $31.5 iha OJE 2019.

Medida Prinsipál hosi Kapitál Menór mak hanesan millaun $8.1 ba Ministériu Finansa atu sosa ekipamentu IT ba sentru ba data backup no mákina X‐ray, millaun $5.3 ba Ministériu Obra Públika hodi sosa karreta boot, millaun 5.0 ba Ministériu no Transporte Komunikasaun hodi sosa ró ba transporte públiku, millaun $4.0 ba Ministériu Interiór atu sosa karreta bombeiru, millaun $2.9 ba Ministériu Defeza atu sosa karreta militár, no ekipamentu ba protesaun no komunikasaun, millaun $2.5 ba Ministériu Administrasaun Estatál hodi sosa karreta 31 ba Administradór Postu no Munisípiu, no mós ekipamentu IT ba eleisaun no ba programa PNDS.

Millaun $2.0 ba Instituisaun Jestaun Ekipamentu atu sosa karreta boot, millaun $2.4 ba Ministériu Edukasaun, Juventude no Desportu hodi sosa meza no kadera ba eskola, millaun $1.7 ba Ministériu Saúde hodi sosa ambulánsia, karreta multi-funsaun, no karreta operasionál ba monitorizasaun no evaluasaun, millaun $1.5 ba Polísia Nasionál Timor‐Leste (PNTL) atu sosa ekipamentu protesaun, veíkulu ba polísia komunitária no tránzitu, millaun $1.0 ba Ministériu Transporte no Komunikasaun hodi sosa bis ba transporte públiku iha Dili.

Dalimak, alokasaun orsamentu ba Kapitál Dezenvolvimentu iha 2020 sa’e ba $22.8 kompara ho 2019 nian, tanba iha aumentu ba projetu saúde, edukasaun no agrikultura, Projetu Dezenvovolvimentu Integradu Munisipál (PDIM) mós hetan alokasaun orsamentu ba Kapitál Dezenvolvimentu iha 2020. Orsamentu ba Kapitál Dezenvolvimentu iha FKTL aloka millaun $263.1 ba Fundu Infraestrutura, millaun $24.1 ba PDIM no millaun $98.0 ba projetu Kapitál Dezenvolvimentu seluk hosi liña ministeriál no ajénsia sira.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here