Komandante Jerál PNTL, Faustino da Costa. Imajen/Tatoli

DILI, 08 novembru 2019 (TATOLI) – Komandu Jerál Polísia Nasionál Timor-Leste (PNTL), Komisáriu Faustino da Costa, apela ba ninia membru sira atu labele provokadu ho vídiu espalladu iha rede sosiál, ne’ebé hatudu konfrontu entre FALINTIL-Forsa Defeza Timor-Leste (F-FDTL) no membru PNTL.

Nia konsidera, vídiu ne’ebé viral iha Facebook, espalladu husi ema irresponsável ne’ebé fahe tutan husi ninia pájina hodi tenta soran instituisaun rua.

Ba kestaun ne’e, Komjer informa parte PNTL hasai ona orden komandu nian ba membru tomak inklui komandante sira hotu, atu alerta katak labele provokadu.

“Orden eskrita ne’e hasai ona husi diretiva Komandu Jerál, hodi fó hanoin ba komandante no membru tomak labele provokadu ho filmajen ne’ebé iha tanba ema irresponsável mak uza filmajen ne’e hodi soran instituisaun rua. Maibé ha’u atu dehan katak, relasaun husi instituisaun rua di’ak hela”, tenik Komisáriu Faustino hafoin enkontru ho Prezidente Repúblika, Francisco Guterres ‘Lú Olo’ iha Palásiu Prezidensiál, Bairro Pité, sesta ne’e.

Nia dehan, hafoin akontesimentu, nia parte ho Xefe Estadu Maiór Jenerál F-FDTL, Majór Jenerál Lere Anan Timur kontaktu malu no hasoru malu hodi ko’alia kona-ba asuntu ne’e.

Komjer haktuir, iha enkontru ne’e líder másimu instituisaun rua fó konfiansa ba ekipa konjunta PNTL no F-FDTL ne’ebé instala ona iha tinan hirak liubá atu halo investigasaun ba kazu ne’e.

Nia salienta, daudaun ne’e ema irresponsável aproveita hodi soran instituisaun rua maski Kamandu rua servisu maka’as atu redús problema iha rai-laran.

Faustino informa, ekipa halo hela investigasaun no bainhira iha rezultadu finál maka hatudu katak pesoál balun komete infrasaun ruma maka sei submete ba rejimentu disiplinár ne’ebé estabelese ona.

“Mandatu ba ekipa ne’ebé halo investigasaun, ninia durasaun loron 30 tuir lei haruka”, nia subliña.

Kona-ba investigasaun ba pesoál irresponsável ne’ebé halo virál vídiu, tuir Faustino ida-ne’e parte importante ida maibé importante liu maka membru sira labele provokadu ho situasaun.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here