Xefe Estadu Maiór Jenerál FALINTIL-FDTL, Majór Jenerál Lere Anan Timur ho Komandante Jerál PNTL Komisáriu Polísia Faustino da Costa, esplika preparasaun forsa rua ba asegura festa konsulta populár, 30 agusto 2019. Imajen/Eugénio Pereira

DILI, 08 novembru 2019 (TATOLI)-Juventude rezisténsia sira hosi Organizasaun Sagrada Familia (OSF) lamenta ho atitude membru Polisia Militár (PM) FALINTIL-Forsa Defeza Timor-Leste (F-FDTL)  balun ho membru Polisia Batallaun Orden Públiku (BOP) envolve iha dezentendimentu hodi halo povu sai pániku. Tanba ne’e, autór sira tenke fuan boot husu  deskulpa ba povu.

Juventude Rezisténsia Organizasaun Sagrada Familia hosi Munisipiu Bobonaro, Martino Tailau “MJ” hateten, atitude ne’e fó ezemplu negativu ba públiku ne’ebé fiar ba forsa rua hanesan liman kro’at no lutu ba nasaun

“Ami hanesan joven rezisténsia husu ba Komandante maun Boot Lere Anan Timur no Komandante PNTL maun Faustino da Costa, atu toma medida hodi husu membru forsa rua rezolve problema no dame para husu fali deskulpa ba povu ne’e. Se forsa rua maka kria fali problema, ami povu atu fó fiar tan ba se,” hateten Martino Tailau, ohin, ba jornalista durante reuniaun Organizasaun Sagrada Família (OSF) iha salaun Restaurante Vitória Metiaut, Dili.

Nia dehan, PNTL no F-FDTL nu’udar lutu nasaun ne’ebé hala’o idak-idak nia knaar tuir Konstituisaun Timor-Leste artigu 147 tenke defende legalidade demokrátika no garante seguransa interna ba sidadaun hotu, prevensaun krime tenke bazeia ba respeitu direitus umanus no Lei maka determina regra no regulamentu  ba polisia no forsa seguransa no forsa sira seluk.

Martino Tailau hatuan, atitude hanesan ne’e komandu PNTL no F-FDTL tenke toma medida hodi rezolve kedas hodi evita kazu hanesan labele repete iha futuru.

Tuir nia haree, públiku pániku no preokupa baihira asiste membru balun hosi forsa rua tiru malu iha krize polítika no militár 2006, baku malu iha Maliana, Ainaro, Baucau no Dili labele akontese beibeik.

Responde ba preokupasaun ne’e, Xefe Estadu Maiór Jenerál FALINTIL-FDTL, Majór Jenerál Lere Anan Timur dehan, Komandu rua halo ona medida hodi buka halibur forsa rua atu rezolve problema no husu deskulpa hikas ba públiku kona-ba atitude la di’ak hodi insulta malu.

“Ha’u husu ona sira ne’ebé halo problema sei tuur hamutuk atu halo konferénsia imprensa para husu deskulpa ba ita nia povu katak, la iha tan problema para servisu hamutuk nafatin, hodi labele halo tan povu ne’e trauma,” Lere afirma.

Lere dehan, hafoin mosu dezentendimentu iha Semitériu Becusi, Dili, foin lalais, membru sira ne’ebé envolve iha konflitu tuur hamutuk rezolve kedas problema.

“Ha’u orgullu sira hatudu ona maturidade atu rezolve rasik problema ne’ebé sira mak kria no sira,” hateten Lere Anan Timur.

Lere hatutan, se ba futuru maka mosu beibeik problema, nu’udar komandante sei la tolera, tanba regra iha F-FDTL klaru ona, se soldadu halo problema beibeik di’ak liu fila ba deskansa iha uma.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here