Sekretáriu Estadu Formasaun Profisionál no Empregu (SEFOPE), Julião da Silva, entrega prémiu ba manán-na'in iha Kompetisaun Nasionál ba Aptidaun, sesta (8/11/2019). Imajen TATOLI/Antónia Gusmão.

DILI, 08 novembru 2019 (TATOLI) – Institutu Nasionál Dezenvolvimentu Mão de Obra (INDMO) enserra tiha ona Kompetisaun Nasionál ba Aptidaun (KNA) hafoin realiza konkursu ne’ebé partisipa hosi kompetidór iha sentru formasaun sira ne’ebé hetan akreditasaun hosi INDMO.

KNA  ne’ebé  halo dezde iha loron 6-8 novembru ne’e, rezulta vensedór iha kategoria tolu mak hanesan konstrusaun sivíl (kompostu hosi kanalizasaun, eletrisidade, pedreiru, karpintaria, no soldadura), kategoria otelaria no auto mekániku.

Rezultadu hosi konkursu ne’e mak vensedór iha área konstrusaun sivíl liuliu iha eletrisidade mak dahuluk, hosi Sentru Formasaun Profisionál Tibar, daruak husi Sentru Formasaun Profisionál Dom Bosco Comoro, no datoluk mak Sentru Formasaun Profisionál Becora.

Vensedór iha karpintaria mak Sentru Nasionál Formasaun Profisionál SENAI Becora, segundu lugar Sentru Nasionál Empregu Formasaun Profisionál Tibar, no datoluk mak Eskola Sekundária Tékniku Vokasionál (ESTV) Fatumaca, Baucau.

Iha kanalizasaun, manán-na’in dahuluk mak Sentru Nasionál Formasaun Profisionál SENAI Becora, daruak, Sentru Nasionál Empregu Formasaun Profisionál Tibar no datoluk mak ESTV Fatumaca.

Iha pedreiru, vensedór primeiru mak Sentru Formasaun Dom Bosco Comoro, segundu mak Sentru Nasionál Formasaun Profisionál Becora, no terseiru, Sentru Nasionál Empregu Formasaun Profisionál Tibar.

Vensedór iha soldadura husi Sentru Nasionál Empregu Formasaun Profisionál Tibar, daruak mak Sentru Formasaun Dom Bosco Comoro, no vensedór tuirmai mak Sentru Nasionál Formasaun Profisionál Becora. Iha soldadura, Komisaun Organizadora mós deside fó prémiu espesial ba feto, tan ne’e Virgina Soares Pereira sai hanesan mellor feto iha área ne’e hodi simu osan ho valór $500.

Biban ne’e, hili mós safety ka saúde no seguransa iha servisu fatin, ne’ebé juri deside ekipa ne’ebé sai mellor mak eletrisidade hosi Sentru Nasionál Formasaun Profisionál SENAI Becora.

Nune’e, iha kategoria Auto Mékaniku, vensedór dahuluk mak Dili Institute of Technology (DIT) no daruak mak Sentru Formasaun Don Bosco Komoro.

Iha kategoria Otelária, primeiru lugar husi Sentru Nasionál Empregu Formasaun Profisionál Tibar, daruak mak DIT, no datoluk ETDA. Iha área ne’e, ema ne’ebé mak hetan mellor mak Marcelino Freitas hosi ETDA hodi simu osan $500.

Sobre valór orsamentu ba vensedór dahuluk sira hamutuk $600, daruak $400, no datoluk $200. Aléinde komisaun organizadora sira entrega prémiu ba manán-na’in sira, entrega mós sertifikadu apresiasaun ba kompetidór, juri no patrosinadór sira.

Diretora Nasionál INDMO, Isabel Fernandes de Lima, hateten INDMO tau hamutuk sentru formasaun sira iha kompetisaun ne’e la’ós atu haree sé mak manán no lakon, maibé se de’it mak manán hothotu manán no se de’it maka lakon hothotu lakon.

“Importante liu ba ami maka hanesan oportunidade ida para imi (kompetidór) koñese malu di’ak, hanesan joven fó imi-nia tempu atubele mai hatudu talentu ne’ebé maka iha”, hateten Diretora Nasionál INDMO iha serimónia enserramentu ba KNA iha salaun Dom Bosco Comoro, ohin.

Nia hatutan, atividade ne’e hanesan mós maneira ida atu joven sira hatudu vontade katak hakarak duni atu kontribui ba dezenvolvimentu nasaun nian liuhosi esperiénsia ne’ebé hetan hosi sentru formasaun ne’ebé estabelese hosi Governu.

“Hosi eventu ne’e, hanesan mós pasu importante ida tanba reprezentante hosi indústria sira mós marka prezensa tan ne’e hanesan maneira ida atu atrai sira atubele uza ita-boot sira hosi atividade ne’ebé iha kompetisaun ne’e hatudu ona kualidade ida maka’as tebtebes”, dehan.

Cesar da Silva hanesan vensedór dahuluk ba área kanalizasaun hosi Sentru Formasaun Profesionál Becora orgullu tanba juri halo observasaun bazeia ba kondisaun.

“Ba ami-nia kapasidade ne’ebé ami halo iha kompetisaun ida ne’e, ne’ebé prémiu ne’ebé fó atu motiva liután ami aprende no kontinua implementa”, hateten Cesar da Silva.

Nia esplika katak antes atu tuir kompetisaun sira treinu tanba hosi INDMO rasik fó kedas ona dezeñu hodi halo preparasaun durante semana rua.

“Área kanalizasaun ha’u sente di’ak tanba atu sai kanalizadór di’ak presiza hatene lee dezeñu nune’e koloka asesória sira tuir nia dalan, tuir padraun, ezemplu, padraun ne’ebé ami uza ne’e padraun Austrália. Ne’ebé hanesan ema kanalizadór sente kompetisaun ne’e di’ak no presiza aprende didi’ak para bele benefisia ba ita nia-aan no ajuda mós ema seluk ne’ebé persiza halo instalasaun espesiál kanalizasaun hanesan hariis-fatin, dada bee-moos”, katak Cesar.

Patrosinadór ba eventu ne’e mai hosi TOYOTA, ESSET, Timor Plaza, ConocoPhillips, Varaidame, Hotel Hilton, PANALASA, Hotel Timor, no Australian Aid.

Notísia relevante : KNA Sai Hanesan Sasukat Ida Hosi Indústria

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here