Estudante sira Eskola Sekundária Katólika Nossa Senhora de Fátima (NOSSEF) Railaco tuir hela ezame. Imajen Tatoli/António Gonçalves

ERMERA, 06 novembru 2019 (TATOLI)Falta fulan rua atu hahú ensinu no aprendizajen períodu dahuluk iha loron 14 janeiru, maibé daudaun ne’e eskola balun enfrenta problema falta sala aula tanba númeru estudante kada tinan sempre aumenta.

Vise-Diretór Eskola Sekundária Katólika Nossa Senhora de Fátima (NOSSEF) Railaco, Cesar Borges, informa agora daudaun totál estudante iha eskola ne’e hamutuk 381.

Vise-Diretór Eskola Sekundária Katólika Nossa Senhora de Fátima (NOSSEF) Railaco, Cesar Borges. Imajen Tatoli/António Gonçalves

“Estudante kada tinan númeru sempre aumenta maibé ami nia sala aula la sufisiente. Agora iha sala sia de’it. Entaun kada tinan ami bele simu de’it ema 150”, nia tenik ba Agência Tatoli iha NOSSEF Railaco, kuarta ne’e.

Nia dehan, kada sala aula balun iha estudante hamutuk 35 no másimu liu to’o 45, “maibé liu númeru ida-ne’e laiha tanba ami nia foku ba ema la’ós atu ba hanorin”.

Eskola ne’e iha profesór hamutuk 22, kompostu hosi feto ualu no mane 14.

“Ami ninia alvu kada turma pelu menus iha alunu 45 de’it, labele liu hosi númeru ne’e”, nia subliña.

Estudante Sekundária Railaco hala’o hela limpeza iha eskola

Nia haktuir, eskola ne’e harii iha tinan 2002 husi ema sira ne’ebé serbisu iha igreja.

“Eskola ida-ne’e inísia no entrega ba Dioseze hafoin Dioseze tau fiar ba Jezuita sira maka hanesan jerente”, salienta Vise-Prezidente ne’e.

Parte seluk, Pároku Railaco, Padre Joseph Nguyen Thanh Phung, hateten daudaun ne’e alunu iha eskola ne’e hamutuk 300 resin ona.

“Fatin la sufisiente tanba kada tinan rejistu estudante foun barak loos, ami laiha fatin atu simu hotu”, Amu ne’e refere.

Pároku Parokia Railaco, Padre Joseph Nguyen Thanh Phung. Imajen Tatoli/António Gonçalves

Tuir Padre, durante ne’e eskola serví di’ak ona ba Sarani Railaco, Parókia no mós suku viziñu sira atu mai eskola tanba ne’e parte eskola no pároku sempre tenta atu kria kondisaun ba estudante sira.

“Kualidade ami sei neneik atu hadia maibé to’o agora inan-aman no família sira ne’ebé haruka oan sira ba eskola NOSSEF maka seidauk kontente”, nia argumenta.

Jornalista: Osória Marques

Editór: Xisto Freitas

HAKEREK NO HATÁN

Please enter your comment!
Please enter your name here