Komandante Jerál PNTL, Komisáriu Faustino da Costa. Imajen Tatoli/Eugénio Pereira

DILI, 08 novembru 2019 (TATOLI) – Durante fulan-outubru to’o 7 novembru, Komandu Polísia Nasionál Timor-Leste (PNTL), rejista ona asidente 191 no insidente 151, hodi rezulta ema na’in-15 mate.

Komandante Jerál PNTL, Komisáriu Faustino da Costa, hateten kauza prinsipál husi asidente no insidente ne’e tanba fatór neglijénsia umana maka kontribui boot liu.

“Insidente hanesan ema asalta malu, baku malu no asidente maka hanesan karreta xoke malu, karreta monu rasik, motór ho motór xoke malu, motór xoke ema la’o rai no seluk tan”, Faustino relata hafoin enkontru mensál ho Prezidente Repúblika, Francisco Guterres ‘Lú Olo’, iha Palásiu Prezidensiál, Bairro Pité, sesta ne’e.

Komisáriu ne’e dehan, asidente komesa husi kamioneta baku fila iha Lospalos, Manehat-Manatuto, Liquiçá, Oé-cusse, inklui Díli laran.

Nia fó ezemplu, hanesan asidente iha Munisípiu Liquiçá ne’ebé ema lanu todan lori motór xoke karau tanba la kontrola-aan no tama kategoria fatór humana.

Seluk, Faustino refere, bainhira ema konsumu alkól barak liu maka lori karreta ho motór, to’o ema liu iha zebra cross mós motorista la para.

Nia observa, durante loron finadu kamioneta sira bainhira ba munisípiu no tula ema nakonu liu kapasidade karreta nian, tanba ne’e komisáriu konsidera kontribui ba fatór umana.

Ho situasaun ne’e, Faustino husu ba ema hotu atu bele uza konsiénsia hodi hanoin, tetu, no asegura-aan bainhira halo viajen no tenke respeita mós regra tránzitu.

“Labele tula pasajeiru liu kapasidade, labele hemu tua, tenke uza kapasete, halai ho velosidade normál no kuidadu-aan atu bele to’o iha fatin ho di’ak”, nia salienta.

Faustino informa mós katak, komandu kontinua halo konsiensializasaun ba komunidade liu-hosi enkontru sira entre Ofisiál Polísia Suku (OPS) no autoridade lokál atu kontinua fahe informasaun ba komunidade no konsiensializa kona-ba regra legál sira ne’ebé iha, nune’e halo redusaun ba insidente no asidente iha rai laran.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here