Responsavel Eletrisidade Timor-Leste (EDTL,sigla Portugés) Munisípiu Viqueque, Domingos Gama. Imajen/ Florencio Miranda Ximenes.

VIQUEQUE, 08 novembru 2019 (TATOLI) – Responsavel Eletrisidade Timor-Leste (EDTL, sigla Portugés) Munisípiu Viqueque, Domingos Gama, informa hasoru hela difikuldade bainhira halo operasaun no manutensaun ba eletrisidade bainhira avaria iha iha área remota tanba laiha kombustivel.

“Ami hetan difikuldade mak kombustivel ba ami susar, maski ami hetan uitoan maibé tenke ba enxe iha Dili, ami servisu iha Viqueque ba enxe fali iha Dili ne’e ladún efisiente tanba ita bá Dili no fila gasta kombustivel ona ne’ebé susar halo operasaun”, Domingos Gama ba Tatoli, iha suku Maluro, Viqueque, ohin.

Nia adianta daudaun ne’e, programa hotu la la’o tanba laiha kombustivel ba transporte sira atu uza bá halo operasaun. “Ami-nia hakarak bele karik ami servisu iha Viqueque bele mós enxe kombustivel iha Viqueque”, sujere.

Domingos Gama dehan kuandu eletrisidade hetan avaria no emerjénsia ruma mak bele bá atende, maibé mós husu ba Ministériu Estatál nia resibu (kupong) mak foin enxe kombustivel hodi bá halo atendimentu.

Tuir nia, EDTL Munisípiu Viqueque presiza kombustivel kada fulan litru rihun ida tanba karreta operasionál tolu no liña media tensaun 300-resin kilómetru sirkuitu.

“Ne’e dook malu, bá parte Watulari no Watucarabau bá to’o baliza Baguia no Natarbora no Ossu baliza Baukau”, nia dehan.

Enkuantu funsionáriu EDTL iha Munisípiu Viqueque hamutuk 20 no proposta hatama ona atu rekruta tan na’in-10.

Viqueque iha suku totál hamutuk 36, maibé suku 8 seidauk asesu ba eletrisidade.

“Ami-nia programa iha 2020 nian ne’e Postu Admnistrativu Ossu, suku lima mak seidauk, parte Viqueque Vila suku ida no Lakluta suku rua ba parte Watulari no Watucarabau nian ne’e suku ne’e 100% asesu ona eletrisidade, maibé aldeia balu mak seidauk”, nia relata.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here