Arquimino Ramos.

Husi:

Arquimino Ramos, S.Sos, B.Bus, MM

Istória polísia sivíl harii iha 1829 iha Inglatera husi Robert Peel ho naran London Metropolitan Polísia no nasaun sira seluk mos forma sira nia polísia hafoin tinan 150 mai oin.

Papel polisiamentu iha Timor-Leste antes koloniál Portugál seidauk iha instituisaun polísia maibé iha momentu ne’ebá moradór sira, liurai nian maka hala’o funsaun polísia atu garante seguransa no asegura desizaun liurai ho nian ukun. Iha administrasaun Portugál iha ona Polísia Seguransa Públika (PSP) no iha Polísia SIPAI ne’ebé koloka iha postu administrativu no administrasaun konsellu.

Tempu okupasaun Indonézia ezisténsia Polísia Repúblika Indonézia (POLRI) ne’ebé rekruta mos Timoroan barak sai membru POLRI ne’ebé balun ohin servi nafatin iha PNTL. Iha era Independensia polísia harii husi ONU ho naran Timor Lorosa’e Police Service (TLPS) iha 2001 transforma ba East Timor Police service (ETPS) to iha tinan 2004 maka muda naran Polísia Nasionál Timor Leste (PNTL) ho dekretu lei númeru 8/2004.

Dezenvolvimentu iha aspetu moris nian iha mundu laiha ida maka nafatin to’o nia rohan inklui setór seguransa ne’ebé afeta ema nia moris no ema barak ko’alia iha era ohin kona-ba reforma iha setór ida ne’e.

Reforma katak atividade hotu ne’ebé hala’o atu halo mudansa (To change), halo perfeitu (To Perfect) no moderniza (To modernize) buat ruma. Iha aspeitu tolu reforma nian maka hanesan estruturál, instrumentál/legál no kulturál.

Aspetu dahuluk estuturál ko’alia kona-ba papel instituisaun, kompeténsia, funsaun. Daruak aspetu instrumentál/legál ne’ebé ko’alia kona-ba lei, regra, sistema, prosedimentu. Datoluk aspetu kulturál maka kustume (kebiasaan) no hahalok(perilaku).

Objetivu reforma tuir Drorr, 2002 maka atu profesionaliza instituisaun, iha efisiensia, iha efikasia, governasaun di’ak no mós hala’o kna’ar tuir lei no povu nia espetativa (people expectation). Reforma sira ne’e presiza hala’o iha instituisaun hotu-hotu inklui Polísia Nasionál Timor-Leste.

Filosofia polisiamentu tuir Anneke osse. 2007 (polisiamentu otoriter/militarismu, polisiamentu komunitáriu, polisiamentu iha krize, polisiamentu bazea ba problema (problem base policing) no polisiamentu bazea ba informasaun(information base policing).

Timor-Leste adopta Polísia Komunitaria tuir dekretu lei númeru 9/2009 16 de Marsu ho motto; VIP Vizivilidade, involvimentu no profesionalismu.

Iha parte seluk Timor-Leste iha ona lei seguransa númeru 2/2010, lei seguransa interna númeru 4/2010 ne’ebé ko’alia kona-ba kooperasaun instituisaun seguransa iha TL, papel no kompeténsia instituisaun defesa no seguransa nian.

Lei organika PNTL númeru 9/2009 ko’alia kona-ba papel, strutura, kompeténsia no filosofia PNTL no regulamentu disiplinar PNTL iha dekretu lei númeru 8/2004 ko’alia kona-ba devér sira PNTL nian.

Polísia profesionál katak polísia ne’ebé hala’o kna’ar tuir lei jerál Nasaun nian, sistema no prosedimentu intituisaun nian no hetan konfiansa husi komunidade atu garante sira nia seguransa no estabilidade.

Iha sorin seluk tuir padraun ONU ba Law enforcement agencies 1979; atu profesionaliza instituisaun seguransa presiza iha investimentu iha área edukasaun, treinamentu, ekipamentu, motivasaun no saláriu ka baibain temi  5W (Well Educated, well Training, well Equipped, well-Motivated, well Salary).

Dezelvolvimentu no Jestaun Rekursu Umanu PNTL

Funsaun rekursu umanu instituisaun nian maka jere prosesu hotu-hotu liga ba pesoál sira nia moris di’ak hodi fornese servisu ne’ebé di’ak.

Prosesu sira ne’e maka hanesan; rekrutamentu, formasaun, kolokasaun, promosaun no pensaun.

Hanesan Nasaun foun no instituisaun foun presiza iha esforsu maka’as hodi dezenvolve iha área hotu inklui dezenvolvimentu rekursu umanu. Tuir mai ami sita mudansa ka reforma balu ne’ebé akontese iha instituisaun PNTL hahú husi nia ezisténsia iha 27 marsu 2000 to’o agora, hakerek nain hakarak elabora de’it kona-ba rekrutamentu no kolokasaun iha edisaun ida ne’e;

Rekrutamentu tempu ONU husi 2000-2004; ho nia kritéria selesaun maka; exame fízika, intervista, ezame médika maibé laiha junta médika.

Sistema rekrutamentu ida ne’e haktuir prosesu rekrutamentu polísia sivíl iha Austrália ho Nova Zelándia ne’ebé UNTAET implementa. Modelu ne’ebé Austrália no Nova Zelándia sira uza haree de’it kondisaun fízika no kapasidade ema atu hala’o servisu polisiál no importante liu kapasidade intelektuál la’ós fízika, tanba ne’e idade hahú 25 to’o 55.

Hafoin krize 2006 laiha tan rekrutamentu to’o reforma sistema rekrutamentu iha kooperasaun téknika ho militár GNR husi 2011 to’o agora, kritéria ba selesaun maka; prova kulturál ka eskrita, ezame dokumentál, prova médika, prova aptidaun fízika, prova psikolojia, entervista profisionál.

Sistema rekrutamentu ne’e haktuir sistema rekrutamentu militár ne’ebé GNR aplika iha Portugál no Brazíl. Prosesu rekrutamentu foun ne’ebé krédivel, iha transparensia no bazea ba méritu iha tempu hanesan laiha fatin mós ba parte hotu atu halo nepotizmu, maibé rekrutamentu ne’ebé haree liu ba iha kondisaun fízika tanba ne’e presiza joven sira ho idade 18 to’o 23.

Rekrutamentu iha nasaun barak hare tuir númeru populasaun, tuir padraun ONU 222 membru polísia ba populasaun 100.000, nasaun barak polísia ida ba populasaun 300 to’o 400. Timor-Leste agora dadauk membru ida ba populasaun 277 signifika katak ita iha rasio populasaun ho númeru membru polísia ne’ebé razoavel ka natoon tuir filosofia polisiamentu komunitáriu bainhira la koloka membru barak liu iha área tatikál.

Iha Nova Zelándia populasaun milliaun haat maibé membru polísia tatikál hanesan Unidade Espesiál la to’o 50 pessoa, iha Austrália, espesialmente Teritoriu Norte tomak inklui kapitál Darwin ho área ne’ebé luan kompara ho Timor-Leste porsentu 15 de’it husi área juridisaun Teritoriu Norte nian maibé membru TRG (Tactical Response Group) hanesan membru unidade espesiál 30 de’it.

Rekruta tan membru foun bainhira membru sira ne’ebé aloka ba servisu tatiku hanesan UEP, UPF no UPM mantein ka aumenta tanba membru sira la-hala’o servisu polisiál lor-loron tuir filosofia polisiamentu komunitáriu.

Se laiha tan rekrutamentu ba membru foun bainhira re-aloka membru sira husi área tatikál sira ba eskuadra sira atu hala’o funsaun polisiál kumpletu hanesan investigasaun, tránzitu, polisiamentu komunitáriu, patrullamentu no servisu informasaun ka intelejen.

Kolokasaun; tuir kompeténsia ne’ebé hatuur iha lei organika PNTL, kompeténsia Komandante Jerál hodi nomea Komandante Unidade, Munisípiu no Departamentu sira inklui halo transferénsia membru husi Unidade ba unidade no Munisípiu hanesan unidade territoriál PNTL.

Kompeténsia Komandante Unidade no Munisípiu sira maka nomeia Komandante Eskuadra no sesaun sira inklui halo transferénsia  iha munisípiu no unidade nia laran ho aprovasaun Segundu Komandante Jerál PNTL.

Kolokasaun bazeia ba meritu (The right men on the right place) tuir nesesidade organizasaun ho durasaun ne’ebé seidauk defini  iha politika própriu ba kolokasaun no dezenvolvimentu kareira PNTL nian.

Sistema sira ami sita iha leten hahú husi rekrutamentu no kolokasaun presiza halo mudansa tuir kondisaun Timor-Leste nian no la tau ba kotuk pratika di’ak ne’ebé aplika internasionál (international best practice) hodi implementa polítika Estadu nia atuál maka hakarak PNTL tuir filosoafia polísia komunitária.

Kolokasaun membru iha área tatikál hanesan UEP, UPF no UPM kuaze métade husi totál membru Polísia Nasionál ne’ebé iha agora inklui sira ne’ebé hala’o funsaun la’ós PNTL nian hanesan Migrasaun revee fila fali.

Rekomendasaun ne’ebé hakerek nain atu hato’o maka bainhira laiha tan rekrutamentu maka presiza de’it re-alokasaun membru husi funsaun tatikál sira ba funsaun polisiál, signifika hamenus membru sira ba protesaun VIP no área tatikál sira seluk tanba komunidade presia protesaun direita husi polísia. Haree ba padraun ONU nian iha leten Komandu Munisípiu Ermera presiza membru PNTL 222 tanba populasaun liu husi 100.000.

Funsaun dahuluk polísia maka investigasaun, tránsitu, Polisiamentu Komunitáriu iklui Ofisiál Polísia Suku (OPS), servisu informasaun polísia no ekipa hatan ba insidente sira hanesan forsa rezerva agora dadauk.

Ho ida ne’e presiza rekoloka membru barak liu iha munisípiu no eskuadra sira, tanba OPS hala’o funsaun rua ida vijilánsia iha suku no ida seluk maka hala’o funsaun iha eskuadra no komandu munisípiu sira.

Hakerek nain Pos Graduado Estudo Estratégico e Resiliência Nacional- ISCSP-Universidade Lisboa e Doutorando iha Gestão Estrategico no dosente iha Fakuldade Siénsia Sosiál no Umana-Universidade da Paz

2 KOMENTÁRIU

  1. Informasaun nb util tebes, Parabens ba hakerek Nain e aseita ba ideia aumenta membru iha Eskuadra tan realidade OPS nb koloka iha Suku hala’o servisu dupla.

HAKEREK NO HATÁN

Please enter your comment!
Please enter your name here