Spot Foto Tokoluli, ne’ebé lokaliza iha Suku Tokoluli, Postu Admunistrativu Railaco, Munisípiu Ermera. Imajen Tatoli/António Gonçalves

ERMERA, 05 novembru 2019 (TATOLI) – Grupu Tokoluli Arte Natureza ne’ebé kompostu husi joven universitáriu, iha hanoin inovativu hodi harii spot foto (fatin hasai foto) nu’udar fatin destinu turíztiku iha Suku Tokoluli, Postu Administrativu Railaco, Munisípiu Ermera.

Responsável Tékniku Grupu Tokoluli Arte Natureza, Pedro Soares Salsinha, hateten inisiativa harii spot foto momentu ne’ebá seidauk iha hanoin atu buka rendimentu.

Responsável Tékniku Grupu Tokoluli Arte Natureza, Pedro Soares Salsinha. Imajen Tatoli/António Gonçalves

“Ami nia iniasiativa harii grupu ne’e iha loron 20 maiu 2019 iha Universidade Paz (UNPAZ). Fofoun harii grupu la’ós atu buka osan maibé atu kontrola fatin ne’e no mementu ne’ebá ami nia fundu laiha”, nia tenik ba Agência Tatoli iha Spot Foto Tokoluli, tersa ne’e.

Nia dehan, hafoin kria spot foto rua (Kaebauk no Liras) maka kada ema bainhira atu tama selu $1 ho durasaun minutu haat.

Joven ne’e haktuir, fatin ne’e halo ho durasaun semana tolu no bainhira atu loke ba públiku, grupu ne’e bolu Xefe Suku Tokoluli no Ofisiál Polísia Suku (OPS) hodi tau Kaebauk no Liras nu’udar símbulu fatin ne’e loke ona ba públiku.

Nia lamenta tanba Timór iha fatin poténsia barak maibé ezekutivu sira maka seidauk tau matan ho di’ak.

“Fatin poténsia turizmu barak maibé parte Governu ladún tau interrese. Ita hatene entaun koko halo oituan no ita haree ema mai barak. Tanba ne’e ba oin ami iha planu halo buat barak”, nia akresenta.

Pedro dehan tan, bainhira grupu ne’e harii spot foto la hetan fundu ruma husi Governu, Organizasaun Naun Govermentál (ONG) ka entidade ruma, maibé husi inisiativa joven ho fundu emprestadu.

“Ami halo ho fundu $120, ne’e maka ami halo spot foto rua ne’e hafoin halo hotu ami fó fila fali osan ne’ebé ami foti husi ema nia”, katak.

Maski nune’e nia rekoñese buat hirak ne’e tuir tempu tanba ne’e presiza iha kreatividade hodi halo tan buat seluk.

Spot Foto Tokoluli (Kaebauk no Liras), ne’ebé lokaliza iha Suku Tokoluli, Postu Admunistrativu Railaco, Munisípiu Ermera. Imajen Tatoli/António Gonçalves

“Buat ne hanesan musiman de’it tanba buat foun maka ema mai barak maibé kuandu bosan ona entaun ema mai menus ona. Bainhira ami hahú loke dahuluk, loron sábadu no domingu maka ema barak liu kompara ho loron bain-bain”, nia konta.

Tuir joven ne’e, bainhira foin loke ba públiku, loron ida bele hetan rendimentu to’o $300, kuandu konta ema tama ho $1.

“Agora vizitante mós menus tanba ema baruk ona atu mai. Agora kuandu iha eventu ruma iha Gleno maka rendimentu bele to’o $50 maibé loron bain-bain bele hetan rendimentu $20”, nia informa.

Responsável ne’e dehan tan, ideia harii fatin ne’e tanba haree modelu hosi nasaun seluk.

“Ami foti referénsia husi ema nia maibé tenke peskiza lai keta halo iha munisípiu seluk halo ona karik. Kuandu halo ona ami lakohi halo tuir sira tanba ami atu halo buat seluk”, Pedro subliña.

Nia refere tan, hafoiin fatin ne’e loke ba públiku, parte Governu no ONG mai to’o iha fatin spot foto hodi fó suporta osan oituan.

“Ami lakohi tamba osan ne’ebé boot no rekursu umanu menus entaun se maka atu jere osan ne’e. Se bele kapasita joven sira nia koñesimentu atu bele hatene kontrola”, joven Suku Tokoluli ne’e sujere.

Jornalista: Osória Marques

Editór: Xisto Freitas

HAKEREK NO HATÁN

Please enter your comment!
Please enter your name here