Sekretáriu Estadu Komunikasaun Sosiál, Merício Juvenal dos Reis Akara. Imajen /Tatoli

DILI, 07 novembru 2019 (TATOLI)— Ezekusaun orsamentu jerál Estadu (OJE) 2019 hosi Sekretaria Estadu Komunikasaun Sosiál (SEKOMS) oras ne’e atinje ona pursentu 75.5.

Orsamentu orijen hosi SEKOMS iha 2019 ho montante $5,097,816.00, kompromisu $318,526.55, obrigasaun $239,667.12, atuál $3,611,072.36, saldu $928,549.97 no ezekusaun to’o fulan novembru atinje ona pursentu 75.5.

Hosi ezekusaun pursentu 75.5 ne’e, Gabinete SEKOMS atinje ona pursentu 80.8, Diresaun Diseminasaun Informasaun atinje pursentu pursentu 42.0.

Nune’e mós, Sentru Rádiu Komunitária atinje pursentu 79.6, RTTL, E.P atinje pursentu 92.0, Sentru Formasaun Téknika no Téknika Komunikasaun (CEFTEC-sigla portugés) atinje pursentu 50.8 no Agência TATOLI, I.P atinje pursentu 58.4.

Sekretáriu Estadu Komunikasaun Sosiál, Merício Juvenal dos Reis Akara, hateten to’o fulan novembru SEKOMS hatudu progresu barak liuhosi ezekusaun orsamentu 2019 nian.

“To’o novembru ne’e, SEKOMS konsege ezekuta %74. Ne’e ezekusaun atuál. Kuandu tau obrigasaun hamutuk SEKOMS konsege ezekuta %80”, nia dehan ba jornalista sira bainhira hala’o audiénsia ho Komisaun G, iha Parlamentu Nasionál, kinta ne’e.

Nia esplika, hosi ezekusaun orsamentu ne’e transfere órgaun komunikasaun sosiál hanesan RTTL, E.P, Agência TATOLI no Rádiu Komunitária sira hamutuk millaun $1.6.

Governante ne’e informa, iha tinan 2019, SEKOMS konsege halo ezbosu lei Rádiu Difuzaun atu atinje ona pursentu 100 no antes dezembru finaliza ona, Lei Apoia Insentivu ba mídia sira hodi asesu ba Fundu Transferénsia Públika ne’ebé Konsellu Ministru aprova ona horisehik, estatutu RTTL oras ne’e iha Konsellu Ministru.

Nia dehan, Agência TATOLI oras ne’e iha ona estrutura, embriaun ba ona Institutu Públiku (IP), ne’ebé oras ne’e Tatoli iha ona notísia ho versaun Tetun, Portugés no Ingléz.

Programa seluk ne’ebé SEKOMS halo iha tinan 2019 mak Naroman ba Suku, hodi lori polítika Governu iha povu nia leet, programa sira Governu Ko’alia no transmite informasaaun ba to’o iha área rurál.

“Polítika governu nian atu moderniza mídia Estadu no sistema, projetu dijitalizasaun RTTL oras ne’e la’o no atinje ona %30 no iha fulan fevereiru hanesan ne’e halo ona teste hosi analog ba iha dijitalizasaun. Jullu hanesan ne’e ita ramata ona projetu dijitalizasaun. Ne’e hanesan mudansa ne’ebé RTTL iha”, Merício esplika.

Purtantu, ba proposta orsamentu ba 2020, SEKOMS propoin millaun $6.575. Hosi montante orsamentu ne’e, saláriu no vensimentu rihun $770, bens no serbisu millaun $1.869, transferénsia públika millaun $1.888, kapitál menór rihun $50, kapitál dezenvolvimentu millaun $1.998 no totál despeza hamutuk millaun $6.575.

Sekretáriu Estadu Komunikasaun Sosiál ne’e fó-sai, katak iha 2020 sei konstrui edifísiu foun ba RTTL no edifísiu foun ba TATOLI, ne’e prioridade prinsipál.

Nune’e mós, prioridade 2020 kontinua apoia mídia Estadu nian hanesan RTTL no Agência TATOLI, estasaun Rádiu Komunidade 16, moderniza infraestrutura, nune’e fornese informasaun ho kualidade ba públiku.

Nia akresenta, iha orsamentu 2020 sei harii torre 12 iha territóriu nasionál, nune’e ema hotu bele asesu ba RTTL.

“Prioridade seluk ita kontinua mantein diseminasaun informasaun kona-ba atividade governativa liuhosi Programa Governu Ko’alia, Programa Haree Rasik, Programa iha Povu Nia Leet, nune’e populasaun bele akompaña progresu dezenvolvimentu”, Merício tenik.

Governante ne’e iha ona hanoin dezenvolve CEFTEC ba iha Institutu Formasaun Jornalizmu ida-ne’ebé ho fasilidade kompletu, nune’e aban bainrua lalika haruka tan jornalista sira tuir formasaun iha rai-li’ur, tanba gasta osan ba ema-nia rai.

“Ita bolu de’it formadór sira hosi li’ur mai fó formasaun iha ne’e”, nia subliña.

Programa seluk ne’ebé SEKOMS iha maka aprezendora sira iha RTTL presiza tan formasaun, nune’e sai aprezentadora di’akliu iha futuru. Programa ne’e rasik SEKOMS sei kolabora ho Metro TV.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here