Diretór Organizasaun Naun Governamentál Saude Ba Ema Hotu (SABEH), André Belo. Imaje: Felicidade Ximenes

DILI, 07 novembru 2019 (TATOLI)—Diretór Organizasaun Naun Governamentál Saúde Ba Ema Hotu (SABEH), André Belo, hateten SABEH sai nu’udar Ministériu Saúde (MS) nia liman-ain hodi tun direta ba komunidade iha área rurál atu fó ajuda ba komunidade  ne’ebé dook husi sentru saúde.

”Saude Ba Ema Hotu, SABEH, ne’ebé halibur voluntáriu sira husi parte médiku, enfermeiru, parteira, saúde públika ho ema sira ne’ebé iha intensaun hakarak hala’o serbisu voluntáriu ba ita-nia komunidade iha área remota iha territóriu Timór laran tomak,” dehan Diretór SABEH, André Belo, ba Ajénsia TATOLI liuhusi entrevista iha nia knaar fatin, Manleu, Dili, kinta (7/11/2019).

SABEH nia knaar prinsipál, nia hatutan, mak lori saúde ba komuindade ne’ebé hela iha área remota no ba komunidade ne’ebé difsil tebes atu asesu ba tratamentu saúde bázika tanba kestaun distánsia no la iha postu saúde. Iha tratementu refere, sira hetan moras grave sira ne’ebé númeru aas liu iha komunidade nia leet.

“Durante ami ba munisípiu hirak ne’e moras infeksaun vias respiratória mak domina iha territóriu Timór laran tomak. Tuir mai mak tuberkuloze, pneumonia,no moras hirak ne’e afeta ba ita-nia dada iis nian,” Diretór SABEH hateten.

Nia dehan, moras seluk mak moras rematizmu ne’ebé kona kurasaun ho naran rheumatic heart disease (kondisaun ne´ebé akontese ba estraga valvula kardiáka ne´ebé haklo´ot ka harahun válvula mitrál) hanesan moras ida ne’ebé SABEH hetan iha labarik sira iha área remotas nian. Moras ne’e hakarak ka lakohi tenke tau matan didi´ak atu nune’e labarik sira labele hetan sofre ne’ebé todan no terus husi kauza ida ne’e.

Ba pasiente sira ne’eb’e hetan moras grave, nia informa, SABEH tenke ko’alia ho família hodi  trasfere ba fatin ida ne’ebé halo tratamentu adekuadu hanesan ospitál referál sira ka Hospitál Nasionál Guido Valadares, Dili.

Nia haktuir, hanesan kazu ne’ebé akontese iha iha Munisípiu Lautem, SABEH konsegue refere pasiente lubuk ida ba Ospitál Referál Baucau para sira halo kontrola intensivu. Bainhira iha ospitál ne’e sei grave liután entaun tenke haruka mai iha Ospitál Nasionál Guido Valadares.

Oinsá kona-ba aimoruk sira ne’ebé SABEH hetan, mia hatán, organizasaun SABEH hetan apoiu ai-moruk husi Servisu Autonómo Medikamentu no Ekipamentu Saúde (SAMES) tanba SAMES hanesan autonomu ida ne’ebé suporta ai-moruk ba SABEH. Maibé, se SABEH la fó apoiu entaun SABEH buka meius hodi sosa rasik no balun hetan apoiu husi klínika hanesan Klínika Foho Osan mean.

Notísia relevante:SABEH Fatin Voluntáriu Ba Médiku Sira

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here