Prezidente Repúblika (PR), Francisco Guterres Lú Olo. Imajen Mídia PR

DILI, 07 novembru 2019 (TATOLI) – Komisaun Organizadora ba komemorasaun Masakre Santa Kruz iha loron 12 novembru, konvida Prezidente Repúblika (PR), Francisco Guterres Lú Olo, atu partisipa no hato’o diskursu ne’ebé sei realiza iha Santa Kruz.

Hafoin hasoru malu iha Palásiu Prezidente Nicolau Lobato, Bairru Pité, Dili, ohin, Prezidente Komisaun Organizadora, Izolino Vas de Alegria hateten Prezidente Repúblika disponível no sei partisipa hodi hato’o diskursu iha komemorasaun importante ne’e.

“Ami mai konvida Prezidente Repúblika atu partisipa iha komemorasaun tinan-ne’e, no Prezidente Repúblika disponível atu partisipa hodi hato’o mensajen iha serimónia ne’e”, nia haktuir.

Sekuénsia hosi atividade ne’ebé sei hala’o iha 12 novembru maka, sei iha misa iha Igreja Motaél kontinua ho prosesaun lori aifunan ba Santa Kruz no kalan sei iha reflesaun iha Semitériu Santa Kruz.

Reflesaun prinsipál iha komemorasaun tinan ne’e, Izolino esplika, sei bazeia ba tema jerál ne’ebé deside husi Komisaun organizadora maka: “Juventude maka autór ba unidade nasionál no dezenvolvimentu ba futuru”.

Orsamentu ne’ebé mak gasta ba komemorasaun ne’e iha nasionál to’o munisípiu sira inklui Rejiaun Administrativa Espesiál Oé-Cusse Ambeno (RAEOA), hamutuk rihun $153.

Nune’e mós, Prezidente Komisaun Organizadora ba Selebrasaun Loron Nasionál Juventude, Zaulino Gomes da Silva rekoñese katak joven timoroan hotu hakarak atu hakmatek, tanba ne’e nia husu ba joven sira hotu atu kontribui ba estabilidade nasionál.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here