Primeiru-Ministru, Taur Matan Ruak. Imajen/Antonio Goncalves

DILI, 07 novembru 2019 (TATOLI)–Primeiru-Ministru (PM), Taur Matan Ruak lakohi komenta ba kestaun deputada balun hosi Aliansa Mudansa ba Progresu (AMP) ameasa atu vota kontra orsamentu jerál Estadu (OJE) 2020 ne’ebé montante boot, tanba konsidera ida-ne’e hanesan kompeténsia husi órgaun soberania ida nian.

Primeiru Ministru hateten, papél Governu nian mak hato’o proposta, no Parlamentu nia papél mak vota a-favor ka kontra.

“Atu vota ka la vota, ida-ne’e Parlamentu Nasionál mak hatene”, Taur hato’o asuntu ne’e hafoin enkontru semanál ho Prezidente Repúblika (PR), Francisco Guterres Lú Olo iha Palásiu Prezidente Nicolau Lobato, Bairru Pité, Dili, ohin.

Taur informa katak órgaun Estadu ida-idak ho nia kompeténsia rasik, nune’e mós kompeténsia Prezidente Repúblika atu halo promulgasaun ka veta OJE 2020.

“Prezidente Repúblika mak sei promulga, no ami-nia parte mak halo aprezentasaun”, Taur hateten ho oin midar.

Antes ne’e, durante audiénsia entre Parlamentu Nasionál (PN) ho Ministra Finansa Interina, Sara Lobo Brites iha 4 novembru 2019, deputada husi bankada CNRT, Virgínia Ana Belo ameasa sei vota kontra OJE tinan 2020.

Deputada ne’e ameasa vota kontra ho razaun, bainhira livru panorama orsamentál 2020 la tuir estrutura no aumentu laiha balansu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here