AIFAESA, MAP no MS halo konferénsia imprensa sobre amostra foos Globus ne’ebé foti ona atu halo teste, maibé menus iha rekursu. Imajen/TATOLI

DILI, 07 novembru 2019 (TATOLI) – Koordenadór Autoridade Inspesaun no Fiskalizasaun Atividade Ekonómika no Sanitaria (AIFAESA), Abílio Oliveira Sereno, hateten AIFAESA foti ona amostra husi foos Globus, maibé labele halo teste tanba laiha rekursu.

Hanesan instituisaun ne’ebé halo kontrolu ba seguransa alimentár iha Timor-Leste iha devér atu foti amostra foos ne’e hodi submete ba laboratóriu Ministériu Saúde (MS) no Ministériu Agrikultura no Peska (MAP).

“Ami só foti de’it sample no submete ba instituisaun rua, maibé atu halo teste ba foos, instituisaun rua ne’e mós labele tanba Ministériu Agrikultura laiha laboratóriu ba ai-han no Ministériu Saúde laiha ekipamentu no rekursu adekuadu atu halo teste”, dehan Abílio Oliveira Sereno ba jornalista sira liuhusi konferénsia imprensa iha Matadouru, ohin.

Abílio dehan atu lori amostra foos ne’e bá li’ur, maibé AIFAESA rasik mós laiha osan.

Iha fatin hanesan, Xefe Departamentu Toksikolojia Laboratóriu Nasionál Ministériu Saúde, Gaspar Pinto, rekoñese katak Laboratóriu Nasionál MS ne’ebé iha Ospitál Nasionál Guido Valadares laiha ekipamentu adekuadu atu halo teste ba ai-han sira.

“Maibé sei ko’alia ho ha’u-nia dirijente sira atu haree rekursu ba sampel ne’ebé maka husi AIFAESA fó ona, no ami promete sei la husik amostra ne’e sai hanesan ne’e de’it”, nia dehan.

Nune’e, Xefe Departamentu refere husu ba Parlamentu Nasionál no Governu tenke tau ona konsiderasaun no importánsia ba iha laboratóriu oinsá hola ekipamentu kompletu, tau rekursu adekuadu, nune’e bá oin bele halo servisu di’ak ba kontrolu saúde públika.

“Ami labele halo buat ida tanba ekipamentu la adekuadu, oinsá atu ajuda ami nu’udar ema tékniku iha terrenu. Tanba ne’e husu Governu no Parlamentu tau konsidera hodi tau osan ba Laboratóriu Nasionál, se lae maka laiha kontrolu ba ai-han importadu sira no fó impaktu ba konsumidór sira”, katak.

Aléinde ne’e, Xefe Departamentu Produsaun Alimentár no Jestaun Pos Kolleita husi MAP, Suzana Vilanova, afirma daudaun ne’e ministériu iha de’it laboratóriu ba rai no batar, maibé ba kontrolu ai-han sira seidauk iha.

“Tanba ne’e difikulta ami halo koordenasaun servisu ba kontrolu ai-han iha Timor-Leste. Ami sujere atu ezekutivu bele tau osan uitoan halo laboratóriu ba ai-han, nune’e bele halo kontrolu ba asegura ai-han importadu husi rai-li’ur”, nia sujere.

Hodi hatutan kuandu la fó importánsia ba kestaun ne’e maka difisil atu halo kontrolu tanba laiha laboratóriu no ekipamentu atu teste ba ai-han sira no ida ne’e sei fó impaktu ba saúde públika.

Notísia relevante : AIFAESA Foti Ona Amostra Foos Globus Importadu Hosi Xina

Jornalista : Natalino Costa

Editora : Maria Auxiliadora

1 KOMENTÁRIU

  1. MAP nia laboratorio iha, rekursu ne’ebe ser iha laboratorio MAP nian iha, nusa mak dehan fali rekursu laiha.

    Se rekursu laiha, bele halo koperasaun ho UNTL Departamento kimika hodi halo teste.

    Solusaun ba fos globus laos deklara ba publiku dehan rekursu laiha.

    Buka solusaun, laos deklara tun sae fali iha publiku.

    Kuandu ba estraga ema nia sasan, rekursu iha.

Leave a Reply to Abilio Cancel reply

Please enter your comment!
Please enter your name here