Komandante PNTL Munisípiu Bobonaro, Superintendenti Xefe, Octávio de Araújo Bucar. Imajen/Antonio Goncalves

DILI, 07 novembru 2019 (TATOLI)-Komandante Polisia Munisípiu Bobonaro, Superintendente Asistente, Octávio de Araújo Bucar, informa, Polisia investigasaun halo ona inkeretu ba suspeitu na’in 11 tanba  involve iha kazu asaltu malu  iha Aldeia Dauderok, Suku Leolima, Postu Administrativu Balibo, Munisípiu Bobonaro.

Konflitu ne’ebé envolve grupu juventude iha loron finadu, 02 novembru 2019, tuku 16.00 Otl, rezulta uma lima hetan sunu, uma rua  hetan estragus no sunu motorizada rua.

Superintendente Asistente, Octávio de Araújo Bucar, informa Polisia Bobonaro sei entrega kazu ne’e ba Ministériu Públiku iha tempu badak no Polisia kontinua buka tan suspeitu sira tanba kazu ne’e involve ema barak.

Nia dehan, komunidade sira ne’ebé antes ne’e evakua ba ai-laran fila ona mai sira ninia hela fatin tanba komandu PNTL destaka membru Polisia rezerva na’in lima inklui Polisia Eskuadra Balibo na’in haat iha fatin ne’ebá hodi fó seguransa ba komunidade.

“Situasaun ein-jerál iha Maliana  lao kontroladu  no iha suku Leolima, Aldeia Duadero mós lao normal,” hateten Octávio de Araújo Bucar, hodi responde Ajénsia TATOLI via telefone, ohin.

Komandante ne’e mós relata kazu asaltu malu ne’ebé akontese iha loron 29  outubru  entre grupu deskoñesidu rua iha Suku Oeleu no Aiasa, Postu Administrativu Bobonaro,  rezulta ema na’in hitu kanek.

Kazu asaltu malu entre joven grupu rua ne’e repete tan iha loron 01 fulan novembru no kazu refere iha ona prosesu investigasaun profunda hodi hatene loloos motivu ba kazu refere.

Iha mós loron 30 outubru, akontese kazu tuda malu entre grupu deskoñesidu rua iha rotunda Maliana rezulta membru Polisia ida hetan kanek iha hasan tanba fatuk mak kona.

Nia tenik tan, iha loron 01 novembru, forsa rezerva prende joven ida  ho inisiál F.D iha área Buipira, Maliana, tanba lori rama ambon. Prosesu investigasaun remata ona no daudaun ne’e tama ona prizaun preventiva iha Prizaun Suai.

Mezmu akontese kazu barak iha semana kotuk, maibé Komandante PNTL Bobonaro ne’e informa, daudaun ne’e situasaun seguransa lao kontroladu no hakmatek.

Jornalista : Agapito dos Santos

Editór       : Francisco Simões

HAKEREK NO HATÁN

Please enter your comment!
Please enter your name here