Kontra atake entre jogadór Kuda Ulun no ADR União iha Kampu Demokrasia, Dili, ohin. Imajen Mídia LFA

DILI, 06 novembru 2019 (TATOLI) – Ekipa FC Kuda Ulun obrigadu fahe pontu (1-1) ho armada ADR União iha jogu kontinuasaun Terseira Divizaun Liga Futeból Amadora (LFA) ne’ebé hala’o iha kampu Federasaun Futeból Timor-Leste (FFTL), Bairru Formosa, Dili, kuarta ne’e.

Iha minutu primeiru jogu hahú, ekipa estimadu hosi Munisípiu Bobonaro alias Kuda Ulun no ekipa kapitál Dili, União, lansa kedas kontra ho atake ba malu tuir tékníku ida-idak nian.

Maibé, kontra atake ne’ebé ekipa rua ne’e hala’o iha primeira parte la rezulta buat ruma.

Dolar ba segunda parte, ekipa rua nafatin hamanas liután jogu hosi tékníku ba tékníku maibé difísil nafatin atu hatama golu tanba defeza hosi parte rua la fó fatin.

Iha minutu 84, jogadór União liuhosi Manuel Rosário konsege fera rede Kuda Ulun bainhira bola barullu iha baliza Kuda Ulun nia oin, nune’e hatuur rezultadu sai 1-0.

Maski nune’e, União nia mehi atu sai manán-na’in la sai realidade. Basá, Kuda Ulun la fó ulun ba União atu sama halimar. Nia (Kuda Ulun) esforsu-aan maka’as lori jogu ne’e sai impata. Golu Kuda Ulun nian atribui hosi jogadór Cornélio da Costa iha minutu 89. Rezultadu nakfilak sai 1-1.

Jogu refere dirije hosi árbitru Francisco Pereira, juiz liña Gerónimo dos Santos, Carcedes dos Reis no árbitru rezerva, Artur Belo.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here