Vise Xefe Bankada FRETILIN, Francisco Miranda Branco. Imajen Tatoli/Egas Cristóvão

DILI, 7 novembru 2019 (TATOLI)—Vise-Xefe Bankada Parlamentár Frente Revolusionária Timor-Leste Independente (FRETILIN), Francisco Miranda Branco, preokupa ho nomeasaun Eis Vise Primeiru-Ministru, José Luís Guterres lidera Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM).

Tuir Branco katak nomeasaun ne’e kompeténsia Primeiru-Ministru nian, maibé tenke koloka ema iha fatin loloos.

“Ha’u-nia hanoin ita tenke kaer prinsípiu tau ema iha fatin loloos. Ida-ne’e mak ita bele halo jestaun di’ak. La’ós tanba ita-nia hakarak, entaun koloka ema la tuir área. Diplomata nia kna’ar ne’e halo diplomasia, maibé ne’e kompeténsia Primeiru-Ministru nian atu hili sé”, nia dehan ba jornalista sira, iha Parlamentu Nasionál, kinta ne’e.

Nia hanoin katak nomeasaun ne’e la tuir dalan loos, tanba José Luis Guterres hanesan diplomata ida atu ba administra no halo jestaun oinsá.

“Nia nunka esperiénsia iha administrasaun no iha jestaun, tanba nia serbisu dezde rezisténsia ne’e iha diplomasia de’it no depois iha era restaurasaun independénsia mós hanesan. Nia sei la rezolve tanba RAEOA ne’e komplexu”, Branco tenik.

Deputadu Bankada Opozisaun ne’e hateten, alterasaun ba nomeasaun hosi Governu halo RAOEA nia estatutu hanesan ho munisípiu 12 seluk.

“Ne’ebé, ha’u hanoin lalika bolu RAEOA ona. RAEOA iha lei maibé depois implementasaun iha orsamentu oin seluk, tanba polítika orsamentál laiha kapitál menór no kapitál dezenvolvimentu. Ne’e ita hatuun ona RAEOA hanesan munisípiu baibain ona”, nia subliña.

Ba tinan 2020, Autoridade Rejiaun Administrativa Espesiál Oé-Cusse Ambeno (RAEOA) propoin millaun $26.086. Hosi montante orsamentu ne’e, fahé ba kategoria saláriu no vensimentu millaun $8.819, bens no serbisu millaun $14.484, transferénsia públika millaun $2.783. Hosi totál orsamentu ne’e ba tinan 2020 RAEOA laiha kapitál menór no kapitál dezenvolvimentu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here