Espoza Prezidente Repúblika, Cidália Lopez Nobre Mouzinho Guterres kaer liman ho Embaixadór Austrália iha Timor-Leste, Peter Roberts. Imajen Mídia PR

DILI, 07 novembru 2019 (TATOLI)–Espoza Prezidente Repúblika (PR), Cidália Lopez Nobre Mouzinho Guterres, agradese ba Ajénsia WaterAid neebé durante ne’e serbisu iha Timor-Leste hodi fornese bee-moos no saneamentu ba komunidade iha Munisípiu Liquiçá no Manufahi.

Espoza Prezidente Repúblika, hato’o agradesimentu ne’e iha serimónia resesaun ho Embaixadór Austrália iha Timor-Leste, Peter Roberts no delegasaun internasionál husi Austrália, Kambódia, Papua Nova Guiné, Myanmar, Inglaterra, inklui Diretór Ezekutivu WaterAid Internasionál, Ken Caldwell no Xefe Ezekutivu Austrália, Rosie Wheen iha Lesidere, Dili, 06 novembru 2019.

“Haksolok ida mai ha’u, simu konvite hosi ita-boot sira hodi partisipa iha resesaun ne’e. Ita hatene katak bee-moos, saneamentu no ijiene sai prioridade ba mundu tomak, liuliu nasaun sira post konflitu, ne’ebé hasoru difikuldade barak ba bee-moos. Bee-moos nia impaktu kuandu laiha atu halo saneamentu no ijiene difísil”, Cidália hateten.

Nia dehan, iha Timor-Leste, durante ne’e komunidade difísil asesu bee-moos no ida seluk mak distribuisaun bee-mos la hanesan, ema ne’ebé iha kapasidade sosa ekipamentu dada bee, nia mak hetan bee barak liu, maibé sira ne’ebé kapasidade finanseiru natón de’it, susar atu hetan bee-moos.

“Ita hotu rekoñese problema bee-moos ohin loron seidauk bele rezolve, tau mós hanesan problema nasionál husi primeiru Governu to’o Governu ohin loron. Tanba ne’e, ita tau fiar ba Governu liuhusi ministériu kompetente hamutuk ho parseiru nasionál no internasionál nune’e bele fó atensaun ba problema bee-moos”, nia hateten.

Espoza PR ne’e esplika katak, husi bee-moos, bele fasilita asuntu oioin, maibé bee-moos laiha, nafatin de’it, maski ita halo kampaña katak, hotu-hotu fase-liman, halo kampaña iha eskola, maibé bee iha komunidade nia uma laiha, sei la garante moris saudável.

Nia mós fó ezemplu katak, labarik ki’ik liuliu feto sira, bainhira ba eskola bee-moos no fasilidade sanitáriu laiha, difísil liu hodi atende nesesidade atu fase liman.

Espoza Prezidente Repúblika kontente ho serbisu TimorAid nian, tanba fasilita ona bee-moos no saneamentu ba Munisípiu Liquiçá no Manufahi, liuliu iha eskola sira.

“Ita agradese WaterAid nia serbisu ne’ebé hahú fasilita ona bee-moos, saneamentu iha Liquiçá no Manufahi. Ha’u hatene katak misaun ida-ne’e la’ós iha Timor-Leste de’it maibé iha mundu,” espoza Prezidente Repúblika afirma.

Ba oin, inan nasaun fiar katak, kooperasaun entre governu ho parseiru internasionál no nasionál sei implementa mós ba munisípiu sira seluk, tuir programa no atividade organizasaun ida-idak.

WaterAid hala’o nia serbisu durante tinan-14 iha Timor-Leste. Foin lalais, liuhusi kooperasaun ho autoridade lokál no komunidade iha Manufahi no Liquiçá deklara tiha ona munisípiu rua livre husi ema soe fo’er arbiru tanba hotu-hotu iha tiha ona haris-fatin rasik.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here