Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur. Imajen/TATOLI.

DILI, 06 novembru 2019 (TATOLI)–Durante enkontru semanál, Prezidente Repúblika (PR), Francisco Guterres Lú Olo ho Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, ko’alia kona-ba situasaun polítika rai laran. 

Hafoin enkontru, Lere hateten, parte rua ko’alia liu kona-ba Eleisaun Antesipada (EA) ne’ebé oras ne’e sai mós asuntu importante iha públiku.

“Ko’alia kona-ba Eleisaun Antesipada ne’e ita lakon tempu de’it”, Lere Anan Timur hateten iha Palásiu Prezidente Nicolau Lobato, Bairru Pité, Dili, ohin.

Nia hatutan, bainhira hakarak atu bá Eleisaun Antesipada, sei vota nafatin ba ema ida de’it, tanba partidu nafatin de’it no ema mós nafatin.

Maski nune’e, Lere tenik, ida-ne’e desizaun polítika entre Prezidente Repúblika ho Governu inklui Parlamentu Nasionál atu halo ka la halo.

“Ita preokupa mak estabilidade, tanba bainhira iha estabilidade dezenvolvimentu mós sei la’o no bainhira estabilidade iha, eleisaun mós sei la’o di’ak tanba ko’alia kona-ba polítika ita haree sé mak ukun Timor, ami sira mai hosi ailaran mak ukun. Tanba ne’e ami hatene malu hela. Dalaruma ema sira iha kraik no ema sira uluk lakohi ukun-aan mak soran ami hirus malu hodi dada impase to’o ohin loron”, Lere subliña.

Ne’e duni, líder másimu F-FDTL ne’e husu ba líder istóriku sira, liuliu sira ne’ebé mak terus ba rai ida-ne’e fó liman ba malu, atu kria pás iha rai laran nune’e povu bele moris hakmatek.

Lere mós apela ba ema hotu atu kontinua hakmatek no sira ne’ebé mak serbisu toos ho natar kontinua nafatin, lalika preokupa ho polítiku sira-nia polítika.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here