Kondisaun Eskola Ensinu Báziku Filiál (EBF) Eraulo nú.230, ne’ebé laiha morru halo animál sira tama ho fásil ba arredór eskola. Imajen Tatoli/António Gobçalves

ERMERA, 05 novembru 2019 (TATOLI) – Eskola Ensinu Báziku Filiál (EBF) Eraulo nú.230, iha Aldeia Darudo, Suku Eraulo, Postu Administrativu Letefoho, Munisípiu Ermera, durante tinan barak nia laran enfrenta problema rai ho komunidade ne’ebé hela iha arredór eskola.

Koordenadór EBF Eraulo, Patrício de Jesus Soares, haktuir defikuldade boot ba eskola ne’e maka rai, hahú husi tinan 2014 to’o agora.

Koordenadór EBF Eraulo nú.230, Patrício de Jesus Soares. Imajen Tatoli/António Gonçalves

“Sira mai sukat rai maibé to’o agora laiha rezultadu. Sukat hamutuk dala haat ona. Agora ema hela tama ona iha área eskola nia tanba eskola ne’e harii iha kampu laran entaun populasaun tama. Bainhira ami halo limpeza labele sa’e liu ba leten tanba ema tau baliza ona”, nia tenik ba Agência Tatoli iha ninia kna’ar fatin, EBF Eraulo, tersa ne’e.

Tuir nia, parte eskola hato’o ona kestaun ne’e ba Edukasaun Munisipál no halo ona enkontru dala tolu ona maibé seidauk hola medida ba rai ne’e.

Eskola Públiku ne’e, iha estudante na’in-187 ne’ebé kompostu hosi mane na’in-105 no feto na’in-82, enkuantu ba Profesór hamutuk na’in hitu kompostu husi mane tolu no feto haat, ne’ebé iha kontratadu haat no permanente tolu.

Prosesu aprendizajen iha sala aula estudante EBF Eraulo nú.230. Imajen Tatoli/António Gonçalves

Sala aula iha eskola ne’e iha hamutuk neen no kada sala iha estudante entre 27 to’o 40.

Tuir Profesór ne’e, parte eskola labele halo buat ida tanba komunidade hela ona iha área ne’e no karik iha lutu ruma maka bele ko’alia.

Nia rekoñese parte eskola labele halo buat ida tanba Profesór sira hela dook husi eskola maibé nafatin tau esperansa ba entidade kompetente sira hodi rezolve.

“Ami dúvida tanba problema kleur ona maibé to’o agora seidauk rezolve. Tuir ha’u nia haree problema ne’e bainhira Governu atu rezolve de’it hanesan problema ki’ikoan. Área ida-ne’e ita lahatene Governu atu rezolve oinsá. Hafoin sira fó surat dehan ami labele book no tenke hein de’it”, nia akresenta.

Nia subliña tan: “Bainhira imi liu maka haree ema kesi karau iha ne’e (área eskola), imi labele hase ami tanba área ne’e iha rai ne’ebé sei iha problema nia laran. Ami mós laiha tan guarda eskola no ami nu’udar mestre la hela iha ne’e”.

Maski iha preokupasaun, maibé nia dehan kona-ba sala aula ba alunu sira hodi hala’o prosesu aprendizajen iha eskola ne’e sufisiente.

Nune’e mós, ba mobiliáriu eskolár hanesan meza no kadeira sei bele akumula estudante sira iha EBF ne’e.

Nia mós refere ituan kona-ba falta bee ba eskola ne’e, hahú eskola harii iha tinan 2008.

“Bee la mai ida. Ami ba kuru iha populasaun sira maka foin enxe ba tanki”, nia informa tan.

Hatan ba problema terrenu, Administradór Postu Administrativu Letefoho, Julião Marito de Deus,  admite katak iha ona koñesimentu husi parte autoridade no baze dadus hodi hatudu eskola ne’ebé de’it maka iha problema.

Administradór Postu Administrativu Letefoho, Julião Marito de Deus. Imajen Tatoli/António Gonçalves

“Ami relata ona relatóriu kona-ba problema ne’e ba nível munisipál ninia, liliu Diresaun Edukasaun maibé to’o agora husi parte Terra no Propriedade Munisipál maka seidauk fó rezultadu para ita bele haree atu muda ka hapara”, nia dehan tan.

Tuir Julião Marito, rai ne’e haree loloos pertense rai estadu no luta labele halo iha ne’ebá, maibé komunidade maka iha sei argumentu.

“Ita haree ba legalidade loloos ne’e pertense hela ba estadu. Parte munisípiu rekoñese katak ida-ne’e sei iha sinál ida hatudu katak ita tenke ko’alia duni no sira rekoñese katak fatin ne’e pertense hela ba rai estadu, nia salienta.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here