Diretór Estabelesimentu Prizionál Gleno, Nito dos Santos. Imajen Tatoli/António Gonçalves

ERMERA, 05 novembru 2019 (TATOLI) – Diretór Estabelesimentu Prizionál Gleno, Nito dos Santos, informa dadur sira ne’ebé hetan sentensa no preventiva iha Prizaun Gleno, daudaun ne’e liu kapasidade.

“Fatin ne’e tuir lolos ba ema na’in-80 to’o 90 de’it, maibé agora dadur hamutuk na’in-119. Ami sente katak la sufisiente ona tanba ne’e sei haree ba kondisaun espasu ida atu bele trata fatin, hodi dadur sira bele hetan espasu”, tenik Diretór ne’e ba Agência Tatoli iha Prizaun Gleno, tersa ne’e.

Aktividade dadur sira iha Prizaun Gleno. Imajen Tatoli/António Gonçalves

Tuir nia, Ministériu Justisa iha ona planu, tanba tuir Lei Injunsaun Penál ko’alia  kona-ba kategoria fatin.

“Tuir loloos ida ne’e fatin feto ninian, maibé haree ba kondisaun no kapasidade orsamentu, inklui impase polítika ne’ebé maka naruk tebes entaun planu sira husi ministériu no Diresaun Nasionál Prizionál laiha orsamentu atu diskute kona-ba programa sira ne’e”, nia akresenta.

Nito dos Santos informa, totál dadur iha Prizaun Gleno agora na’in-119 no hosi númeru ne’e dadur mane 96 no feto 23.

Enkuantu dadur hamutuk na’in-107 maka hetan sentensa no na’in-12 maka hetan preventiva.

Nune’e mós, iha dadur estranjeiru na’in-rua husi Indonézia.

Prizaun ne’e mós iha bebé ida ne’ebé mai ho ninia inan.

“Bebé ne’e la’ós dadur no ninia tratamentu hanesan labarik sira iha liur. Ministériu Justisa haree hela kona-ba tratamentu ba ninia moris, nesesidade báziku no serbisu hamutuk Ministériu Solidariedade Sosiál no Ministériu Saúde hdoi haree ba ninia tratamentu saúde.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here