Xefe Bankada CNRT, Duarte Nunes. Imajen/Egas Cristovão

DILI, 06 novembru 2019 (TATOLI)–Bankada Parlamentár Congresso Nacional da Reconstrução de Timor (CNRT) no Kmanek Haburas Unidade Timor Oan (KHUNTO), husu Prezidente Rejiaun Administrativa Espesiál Oé-Cusse Ambeno (RAEOA) foun, José Luís Guterres “LUGU” serbisu ho imparsialidade.

Xefe Bankada Parlamentár CNRT, Duarte Nunes, hateten José Luís Guterres hanesan ema rezisténsia ida, merese lidera RAEOA.

Duarte Nunes husu ema hotu apoia Eis Ministru Negósiu Estranjeiru no Kooperasaun ne’e lidera RAEOA ho susesu.

“Primeiru-Ministru hili ona tenke iha orientasaun, fó fasilidade, fó apoiu tomak para nia bele hetan susesu. Presiza buka ekipa di’ak apoia nia, halo serbisu ho imparsialidade tanba iha ne’ebá iha grupu rua ne’ebé ko’alia didi’ak para sira serbisu hamutuk”, Xefe Bankada Parlamentár CNRT ba Agência TATOLI, iha Parlamentu Nasionál, kuarta ne’e.

Entretantu, Deputada Bankada KHUNTO, Olinda Guterres, dehan Xefe Governu indika José Luís Guterres merese duni tanba esperiénsia barak ona no ema matenek na’in ida.

“Partidu KHUNTO husu, ba iha ne’ebá (Oé-Cusse), naran katak serbisu ho imparsialidade”, Olinda tenik.

Deputada ne’e hateten katak RAEOA nabilan tiha ona maibé nabilan iha vila de’it, tan ne’e husu José Luís atu diversifika nabilan ne’e to’o iha área rurál.

“Doutór José Luis Guterres ba iha ne’ebá presiza tau importánsia ba área rurál ne’ebé ahi seidauk tama, estrada aat. Labele nabilan iha vila de’it. La’ós to’o kampaña mak ba buka fali povu iha área rurál”, Olinda akresenta.

Deputada ne’e husu LUGU hadi’a buat ne’ebé laloos no kontinua buat di’ak ne’ebé eis Prezidente Autoridade RAEOA, Marí Alkatiri husik hela.

Entretantu, Deputada Partidu Libertasaun Populár (PLP), Maria Angelina Sarmento, laiha opiniaun ba asuntu nomeasaun ne’e.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here