Supervizór Fábrika Prosesamentu Kafé bokon iha CCT Railaco, José Almeida. Imajen Tatoli/António Gonçalves

ERMERA, 07 novembru 2019 (TATOLI) – Hanesan organizasaun ne’ebé hamrik iha Timór, Kooperativa Kafé Timór (CCT-sigla portugés) kobre ona munisípiu neen ne’ebé iha potensia liu ba kafé hanesan Ermera, Liquiçá, Aileu, Same, Ainaro no Bobonaro.

Supervizór Fábrika Prosesamentu Kafé bokon iha CCT Railaco, José Almeida, hateten kooperativa ne’e hamriik atu promove produsaun ne’ebé sai primadona iha Timór hansan Kafé hodi lori ba mundu internasionál.

Kafébiha plantasaun CCT Railaco. Imajen Tatoli/António Gonçalves

“Totál membru Kooperativa Kafé Timór iha munisípiu neen hamutuk 25.760. Sira hetan ona kartaun no treinamentu hanesan informasaun ne’ebé ami nia tékniku sira fó ba sira”, nia tenik ba Agência Tatoli iha CCT Railaco, kuarta ne’e.

Nia dehan, Railaco hanesan sentrál tanba ne’e kada fulan neen agrikultór sira ne’ebé iha vizaun di’ak tuir treinamentu atu bele habelar informasaun ba bebeik.

José Almeida informa, kooperativa ninia programa la haree liu ba kafé de’it maibé iha mós kakau ne’ebé barak liu iha munisípiu Lospalos, Baucau, Viqueque, Ermera, no Suai.

Nia akresenta, daudaun ne’e CCT habelar tan pimenta, kraviñu, no baunilla.

Baunilla iha plantasaun CCT Railaco. Imajen Tatoli/António Gonçalves

“Kona-ba Baunilla, agora daudaun CCT fó hela treinamentu hodi hanorin agrikultór sira atu prosesa sai produtu tanba iha parte Letefoho iha poténsia ba baunilla. Kuaze kada tinan ema hetan rendimentu boot husi baunilla”, nia dehan tan.

Nune’e mós, Kooperativa ne’e hanorin ninia membru sira ne’ebé maioria agrikultór hodi halo viveiru individuál iha sira ninia uma, ho ajuda husi tékniku sira maibé sentrál halo iha Railaco.

CCT mós distribui ai-oan ba agrikultór sira hodi sira bele kuda.

 

Kakau iha plantasaun CCT Railaco. Imajen Tatoli/António Gonçalves

Serbisu hamutuk mós ho East Timor Coffee Institute (ETCI) hodi kapasita estudante universitáriu sira hodi bele iha hanoin inovativu harii negósiu rasik hafoin ramata estudu.

CCT iha inísiu harii iha tinan 1994 to’o ohin loron no halo kooperasaun ho Nacional Cooperative Business Association (NCBA).

NCBA momentu ne’ebá halo kooperasaun serbisu ho Pusat Kooperasi Unit Desa (PKUD) hafoin hamosu Kooperasi Unit Desa (KUD).

“Haree ba ninia lala’ok programa iha Timór ne’e la’o di’ak, entaun nia hamosu ninia Cooperativa Café Timor”, José Almeida haktuir.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here