Diretór ESG Nicolau Lobato, Marcos Soares Pacheco. Foto TATOLI: Nelia Fernandes

DILI, 07 Novembru 2019 (TATOLI)-Iha tinan létivu foun 2020 mai, Ensinu Sekundária Jerál (ESG), Nicolau Lobato sei bandu nia estudante sira hodi lori telemovel kamera tama iha eskola tanba estudante dalabarak la ativu iha atividade letiva sira durante aula.

“Tinan 2020, ami bandu liuliu telefone, agora tinan oin ami implementa totál ona labele lori telemovel kamera tanba kazu hirak ona mak akontese iha eskola, ami prende telefone balun tau hela iha ne’e,” haktuir Diretór ESG, Nicolau Lobato, Marcos Soares Pacheco, ba Ajénsia TATOLI iha nia kna’ar, fatin foin lalais ne’e.

Manorin na´in ne’e konsidera iha mundu dijitál iha “segredu” mós estudante sira asesu, ida ne´e perigu.“Ami mós koko dala ruma enkontru iha Ministériu, ami hato’o, haree to´ok lei ruma sirkula para estudante sira labele lori telefone kamera ba eskola, se bele lori de’it telemóvel Alkatel ba eskola hodi inan-aman sira kontaktu, maibé la iha rezultadu,” katak diretór.

Nia informa, parte eskola mós fó hatene ona ba estudante sira atu labele lori telemovel kamera mai eskola maibé kontinua akontese. “Ami prende telefone balun ona tanba iha evidénsia ami prende no lá fó ona. Perigu aat liu mak iha aula laran, profesór sira hanorin namanas iha oin, estudante sira iha kotuk tama facebook namanas los, atensaun ba matéria la iha, ho ida ne’e ami bandu atu labele lori telemovel mai eskola”.

Diretór ESG Nicolau Lobato, Marcos Soares Pacheco reforsa, iha tinan létivu oin mai ne´e sei enkontru ho inan-aman sira hodi fó hatene atu labele fó telefone kamera ba oan sira, sebele fó telemovel Alkatel hodi lori mai eskola, atu inan aman sira kontaktu.

“Bandu estudante sira la lori telefone implementa iha tinan rua kotuk ona  maibé akontese nafatin. mi avizu ba estudante sira mas nafatin de’it, entaun iha tinan oin ami koko enkontru ho inan-aman sira, para fó hatene,” haktuir manorin na’in ne’e.

Maske nune´e, tuir diretór ESG Nicolau Lobato katak problema ida bainhira profesór sira hasoru liuliu bainhira atu bolu estudante sira-nia inan-aman maibé estudante sira balun lamenta katak sira hela iha uma kos.

“Ami atu hasai estudante husi eskola mós, sira mai ko’alia dehan hela kos, dala ruma to’o bolu nia kolega mai. Ida ne’e mak difikuldade no ami buka atu rejistu inan-aman no estudante sira rasik mak tenke mai, para ami hodi hatene tuir..

Alende, ESG Nicolau Lobato bandu estudante sira lori telemovel mai eskola, iha parte seluk mós bandu estudante sira lori sasan kro´at, droga, tua inklui buat ne’ebé negativu nian ba iha eskola.

Notísia relevante:ESG Nicolau Lobato Koopera Ho ONG Ba Futuru Promove Formasaun Ba Profesór Sira

Jornalista : Nelia Fernandes
Editor        : Rafy Belo

HAKEREK NO HATÁN

Please enter your comment!
Please enter your name here