DILI, 06 novembru 2019 (TATOLI)-Programa Nasaun Undia ba Dezenvolvimentu (UNDP-sigla ingles), ohin, entrega karreta tolu ho motor rua ho ekipamentu sira hanesan komputadór, kamera no projetór ba iha Sekretáriu Estadu Protesaun Sivíl (SEPS).
Oferta UNDP nian hanesan karreta ho kondisaun di’ak Ford Ranger rua (2) Prado (1) no motor Kawasaki KLX rua (2), ho totál kustu ba karreta ho motor hirak nee hamutuk $80. 200.
Jestu apoiu solidariedade hosi UNDP nian ne’e liuhosi programa “Dili to Ainaro Road Corridor Project” ne’ebé foku liu ba reziliénsia ba komunidade hodi tulun liu tan servisu governu liuhosi Sekretária Estadu Protesaun Sivíl.
Serimónia termu entrega transporte no ekipamentu hirak ne’e hala’o iha edifísiu SEPS Caicoli, Dili, hosi Resident Representative UNDP iha Timor-Leste, Munkhtuya Altangerel ba Sekretáriu Estadu Protesaun Sivíl Alexandrino Xavier Araújo.
SEPS Alexandrino Xavier Araujo, lori governu nia naran hato’o agradese ba UNDP nia apoiu ne’e no husu mós ba funsionáriu SEPS atu kuida didi’ak ekipamentu hirak ne’e ba interese Estadu nian.
Jornalista : Nelson de Sousa
Editór : Francisco Simões
