Matebian Constâncio da Costa dos Santos (Aquita Tama Laka). Imajen/foti hosi kronolojia Facebook Aquita Tama Laka Nofi

DILI, 06 novembru 2019 (TATOLI)–Prezidente Repúblika, Francisco Guterres Lú Olo, liuhusi Dekretu Prezidente Repúblika númeru 48/2019, 6 novembru, rekoñese Constâncio da Costa dos Santos “Tama Laka” ninian kontribuisaun iha luta ba independénsia nasionál.

Komunikadu ne’ebé fó sai husi Palásiu Prezidensiál Nicolau Lobato, Dili, 6 novembru 2019, hateten, tanba ho ninia kontribuisaun iha luta ba independénsia nasionál, Constâncio da Costa dos Santos “Tama Laka” iha direitu atu hetan onra fúnebre no sei hakoi iha Jardim dos Herois da Pátria iha Liquiçá.

Iha komunikadu ne’e deskreve katak Constâncio da Costa dos Santos “Tama Laka” durante tempu okupasaun Indonézia partisipa ativamente iha organizasaun klandestina hodi luta ba ukun rasik-aan.

Tama Laka partisipa iha manifestasaun hasoru Embaixadór Estadu Unidu Amérika John Monjo iha Hotel Turismo iha 1990 no 12 novembru 1991 ne’ebé koñesidu ho Masakre Santa Cruz.

Iha Indonézia, Tama Laka partisipa iha atividade klandestina hamutuk Asosiasaun Sosialista Timor (AST).

Iha tinan-1997, Constâncio da Costa dos Santos lori bomba mai Timor-Leste ho alvu atu harahun infraestrutura prinsipál Indonézia ninian, maibé militár Indonézia kaer uluk molok hala’o nia asaun.

Ho ninia envolvimentu lori bomba mai Timor-Leste, Tama Laka hetan pena tinan-20 no kastigu iha prizaun Becora.

Iha tinan-1998, Tama Laka konsege halai sai husi prizaun ba ai-laran hodi reziste hamutuk ho FALINTIL.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here