Sekretáriu Estadu Formasaun Profisionál no Empregu (SEFOPE), Julião da Silva. Imajen/Tatoli.

DILI, 06 novembru 2019 (TATOLI) – Sekretáriu Estadu Formasaun Profisionál no Empregu (SEFOPE), Julião da Silva, sujere Konkursu Nasionál ba Aptidaun (KNA) tinan ida tenke realiza dala-rua, nune’e setór privadu sira bele haree barak liután kapasidade hosi sentru formasaun ba sira-nia esperiénsia ne’ebé hetan ona.

“Ha’u-nia sujestaun katak se bele konkursu nasionál aptidaun ne’e tinan ida halo dala-rua, labele dala-ida de’it para nune’e bele konvida setór privadu sira bele haree barak liután”, dehan Julião da Silva iha ámbitu abertura KNA ne’ebé realiza hosi Institutu Nasionál Dezenvolvimentu Mão de Obra (INDMO) iha Sentru Formasaun Dom Bosco, Komoro, ohin.

Governante ne’e hatutan bainhira realiza fali konkursu ne’e, kona-ba ekipamentu sira ne’ebé sei tau durante iha konkursu lori de’it hosi sentru formasaun ida nian ho objetivu para sira aprezenta ekipamentu saida maka durante ne’e sira uza, nune’e menus karik Governu liuhosi SEFOPE bele fó apoia.

“Labele ita maka sosa kompletu depois sira mai uza, keta halo ba ekipamentu sira ne’e ita maka sosa hotu sira mai uza de’it no sira mós konfuzaun hela oinsá atu uza, tanba ekipamentu ne’ebé ita sosa iha sira-nia sentru formasaun laiha, maibé se iha di’ak liu”, dehan Julião.

Tuir Julião, atu dehan kualidade mão de obra tenke hatene uluk utiliza ekipamentu. “Oitavu Governu Konstitusionál kontinua fó prioridade ba iha kapitál umanu, tantu ba edukasaun formál no mós non-formál. Kona-ba edukasaun formál iha ona planu tinan oin Timor-Leste sei estabelese sidade universitária ida iha Munisípiu Aileu, ne’e kompromisu, no edukasaun non-formál maka tau ona iha planu 2020 atu estabelese sentru formasaun ne’ebé sei harii iha Metinaru, no kontinua dezenvolve nafatin rekursu umanu ne’ebé maka iha, hadi’a kualidade mão de obra”, Julião subliña.

Julião haktuir, dala ruma joven sira kuandu tuir kursu hotu lakohi implementa esperiénsia sira ne’ebé hetan, maibé bainhira implementa filafali durante formasaun nia hatene kona-ba solda entaun bele loke fali ofisina ho kapasidade ne’ebé iha depois ho folin baratu bele atrai ema barak.

“Indústria ne’e bele mai hosi ita-nia aan rasik, ezemplu ida maka se ita kria soldadura ida di’ak iha Dili laran ho folin baratu no kualidade garantidu ha’u hanoin ema hothotu bele bá”,  nia afirma.

Líder másimu SEFOPE ne’e dehan, dadus hatudu katak to’o agora seidauk bele prodús ema tuir nesesidade indústria, foin ema rihun tolu, más haree fali ba nesesidade indústria ne’ebé presiza rekursu liu númeru ne’ebé iha.

Kona-ba ida ne’e, SEFOPE rekoñese katak Governu sei iha lakuna balu, tanba ne’e kompromete katak sei hadi’a lei orgánika foun SEFOPE nian hodi estabelese sekretáriu ida hodi tama iha ministériu sira para bele kontribui hodi mellora dadus ba formandu sira ne’ebé remata ona formasaun no prepara sira hodi nune’e setór privadu sira presiza ema karik Governu prepara ona hodi aloka ba sira ne’ebé presiza.

Notísia relevante : KNA Sai Hanesan Sasukat Ida Hosi Indústria

Jornalista: Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here