Segundu Komandte Munisípiu Ermera, Inspetór Xefe António Soares. Imajen/Osória Marques

ERMERA, 05 novembru 2019 (TATOLI) – Segundu Komandte Munisípiu Ermera, Inspetór Xefe António Soares, informa daudaun ne’e rekursu ba Polísia Nasionál Timor-Leste (PNTL) iha Munisípiu Ermera limitadu hodi halo movimentasaun.

“Bain-bain Ita haree rekursu maka limitadu. Maibé ami mós iha ona Ofisiál Polísia Suku (OPS) ne’ebé koordena hamutuk Administradór Postu, Konsellu Polísia Komunitária (KPK) no Xefe Aldeia sira hodi haree servisu ne’ebé maka di’ak hodi atende kazu saida de’it maka akontese iha suku sira no kria estabilidade seguransa”, nia tenik iha eskritóriu Kuartél Komandu PNTL Munisípiu Ermera, tersa ne’e.

Tuir nia, maski rekursu ba movimentu Polísia nian limitadu maibé sira sempre halo jestaun ne’ebé di’ak hodi bele asegura seguransa iha área jurídiku Munisípiu Ermera.

António Soares dehan daudaun ne’e rádiu komunikasaun ne’ebé maka membru Polísia sira uza hodi halo komunikasaun maka aat hotu ona, tanba ne’e agora membru sira uza de’it sira-nia telefone hodi komunika ba malu bainhira hala’o serbisu.

Nia refere oituan kona-ba viatura mós sei limitadu tamba de’it jeografikamente iha Postu Administrativu ho kondisaun estrada ne’ebé maka ladi’ak no bele halo karreta labele halo operasaun to’o iha suku no aldeia sira.

Nia subliña, Eskuadra sira mós iha ona karreta maibé ninia manutensaun maka la’o ladi’ak tamba hadi’a lakleur aat ona kauza husi estrada ne’ebé la favorese maibé la’ós impedementu ba Polísia sira hodi halo atividade.

“Ita nia OPS sira mós iha ninia motor mesak hodi apoiu ba munisípiu, postu, suku no aldeia sira”, haktuir.

Nia mós informa, kada Polísia Eskuadra Postu Administrativu iha kareta hotu, enkuantu iha munisípiu maka kareta rua hodi halo operasaun.

Horiseik ami simu tan karreta ida hodi suporta ba Polísia Eskuadra sira.

Jornalista Osória Marques

Editór: Xisto Freitas

HAKEREK NO HATÁN

Please enter your comment!
Please enter your name here