Prezidente Autoridades Nasional Comunicação ( ANC) João Olivio Freitas. Imajen/Tatoli.

DILI, 05 novembru 2019 (TATOLI) – Prezidente Autoridade Nasionál Komunikasaun (ANC, sigla portugés), João Olívio Freitas, informa empreza ne’ebé hakarak harii operadór telekomunikasaun iha Timor-Leste iha obrigasaun atu kumpre rekizitu 14 ne’ebé ANC fó sai.

Tuir lei númeru 15/2012, iha aneksu 1, kona-ba deklarasaun rejistu operadór telekomunikasaun ho nia rekizitu hamutuk 14 ne’ebé empreza tenke halo tuir maka ;

1. Empreza ne’ebé atu estabelese operadór telekomunikasaun nian, estabelese nia edifísiu iha Timor-Leste no tenke bazeia ba legalidade jurídiku

2. Empreza ne’e tenke hatudu ninia kapitál hodi ba halo investimentu ida ne’e.

3. Tenke iha sertu ba loron lansamentu dahuluk ba nia operadór no tenke iha ona klareza ba fatin ne’ebé maka atu halo lansamentu dahuluk ba operadór ne’e rasik.

4. Tenke iha ofisializasaun ba fundu loloos signifika nia maizumenus avansa fundu hira ba investimentu ne’e.

5. Operadór telekomunikasaun tenke iha ona nian naran ba operadór ne’ebé nia atu harii empreza ne’e, tenke iha ona garantia ba operadór ne’e rasik no operadór ne’e tenke mai ona ho ninia estrutura kompletu liuliu estrutura ne’ebé atu jere operadór ne’e rasik.

6. Operadór ne’ebé maka harii iha nasaun ne’e tenke iha obrigasaun hodi submete ba regulamentu no lei sira no iha obrigasaun submete kuandu viola regra operadór ne’e prosesa tuir norma nasaun ne’ebé nia halo investimentu bá.

7. Operadór ida tenke fó garantia ba iha kliente sira.

8. Empreza ne’ebé maka harii operadór ne’e tenke iha fundu boot no nia kaer asaun boot husi investimentu ne’ebé nia halo.

9. Empreza ne’ebé maka harii operadór ne’e iha obrigasaun tenke aprezenta ninia osan atu halo investimentu ba Governu.

10. Empreza ne’ebé maka atu harii nia operadór telekomunikasaun tenke ema rua sai matadalan hodi aprezenta ba Governu.

11. Operadór ne’e tenke iha garantia ba liña atendimentu ba komunidade.

12. Kualkér informasaun ne’ebé maka bele fó sai no labele fó operadór telekomunikasaun ne’e maka iha obrigasaun tenke rai.

13. Governu sei la halo deskualifikasaun enkuantu empreza operadór telekomunikasaun ne’e kompleta hotu ona rekizitu.

14. Operadór sei halo deklarasaun hodi deklara ho loloos ba Governu kona-ba ninia dokumentu sira ne’e loos duni katak nia kumpre ona rekizitu ne’ebé husi Governu fó hodi halo atividade telekomunikasaun ho loloos.

“Ami aplika rekizitu hanesan ba operadór sira, laiha ida diferente ho operadór seluk. Hanesan ami aplika rekizitu ba operadór sira tenke QoS (Quality of Service) uluk Governu fó ba operadór tolu ne’e ita-boot nia success rate ne’e mínimu ne’e 98%, entaun ita mós fó buat ne’ebé hanesan ba iha Ceslink, aléinde Timor Telecom no Telkomsel, depois ita-boot nian call set feller ne’e mínimu 2%, entaun ita mós fó ba iha Ceslink 2%, ne’e ita sei halo tratamentu iguál ba operadór sira”, esplika João Olívio Freitas ba Ajénsia Tatoli iha nia knaar fatin Kaikoli, ohin.

Hafoin rekizitu hirak ne’e, tuir mai sei iha formatu osan ne’ebé tau hosi operadór Ceslink iha banku, hafoin banku hasai karta ida fó ba ANC katak osan ne’e tau hosi operadór.

Ezemplu, ba operadór katak tinan tolu nia laran tenke atinje kobertura 95% , entaun orsamentu ne’ebé maka sira tau iha banku tenke ba tinan tolu ne’e ba boom performance.

Aléinde husi boom performance sei iha mós rekizitu ida katak empreza tenke kumpre maka nia baze iha Timór, ka Ceslink nia edifísiu sentrál tenke iha Timór atu ba futuru depois operadór nia kliente enfrenta problema ruma bele halo komunikasaun fásil.

Nune’e mós kualidade serbisu mós sai hanesan kritéria signifikante liuliu liga ba iha success rate ka xamada telemovel tenke garante ba kualidade serbisu operadór Ceslink nian ba futuru ba populasaun, ne’e mínimu tenke porsentu 98, labele menus liuhusi ida ne’e.

“Ezemplu ita iha asesu ba rede telemovel iha sidade bainhira ita dere ba númeru Ceslink nian success rate, ne’e tenke 98% ba leten ne’e atu dehan de’it bainhira ita dere ba númeru ne’e labele falla no tenke lian”, katak.

Notísia relevante : Ceslink Kompleta Ona Dokumentu

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here