Diretór ESJ 5 de Maio, Manuel Verdial. Foto Fontes

DILI, 06 novembru 2019 (TATOLI)—Diretór Eskola Ensinu Sekundária Gerál (ESG) 5 de Maio Becora, Manuel Verdial, informa eskola refere iha sala de aula haat ne’ebé durante ne’e afetadu ba dezastre naturál tanba bainhira udan monu rai, bee ne’ebé suli tuir mota ne’ebé besik eskola ne’e lori lalin rai-henek nakonu iha sala de aulas refere.

“Eskola ho sala de aulas haat ne’e harii iha 1995 to’o ohin loron sei utiliza hela maibé risku boot. Tanba bainhira udan boot ona udan-been ne’e lalin rai-henek nakonu iha laran. Eskola iha hanoin ida hakarak atu baku rahun tiha hodi halo konstrusaun foun fali maibé presiza fundu no ekipamentu ida ne’ebé adekuadu. Agora eskola laiha kbiit atu halo ida ne’e,” dehan Diretór Eskola, Manuel Verdial, ba Ajénsia TATOLI liuhusi entrevista iha nia knar fatin, Becora, Dili, kuarta (06/11/2019).

Maibé, nia hatutan, se Ministériu Edukasaun Juventude no Desportu (MEJD) iha planu 2020 atu harii sala de aulas 2.000 (rihun rua) inklui mós Eskola 5 de Maio nian entaun agradese tebes. Signifika todan ne’ebé eskola ne’e enfrenta bele ona hadi’a no bainhira udan karik estudante sira sei la muda fatin ba sala de aula seluk.

Notísia relevante:MEJD Sei Kumpleta Infrastrutura Iha 2020

Nia afirma konstrusaun ida di’ak tenke garante ho aliserse ida metin ho kualidade. Tanba sala haat ne’e ninia kondisaun ne’e kategoria ona risku dezastre tanba bele iha eskola ka sala de aulas okos ne’e permanente ona.

“Purtantu tinan ida ne’e parese akontese ho mudansa klimátika entaun Eskola 5 de Maio mós kontinua realiza ninia atividade ekstra mós ho di’ak diferensa ho tinan hirak liu ba ne’e. Ne’eduni, ha’u iha esperansa katak Eskola 5  de Maio hein nafatin Governu ninia apoiu atu bele garante kualidade ba eskola ida ne’e,” nia dehan.

Iha terenu, tuir TATOLI nia observasaun katak kondisaun eskola refere nafatin iha kondisaun aat maibé prosesu ensinu aprendizazen kontinua la’o hanesan baibain. Konsege identifika katak iha duni risku ne’ebé boot tanba sala haat ne’e ninia parede mak sai fali moru hodi satan bee-mota iha tempu udan. Maibé daudaun ne’e hetan  ona intervensaun husi Governu.

Notísia relevante:Eskola ESG 5 de Maio Sei Harii Laboratóriu Siénsia

Jornalista :Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here