Diretór Servisu Munisipál Saúde Ermera, Graciano da Costa Crus. Imajen/Osória Marques

ERMERA, 05 novembru 2019 (TATOLI) – Diretór Servisu Munisipál Saúde Ermera, Graciano da Costa Crus, husu Governu Sentrál liuhosi Ministériu Saúde atu hadi’a sistema burokrasia hodi nune’e bele fó atendementu ne’ebé lais ba komunidade nível munisipál.

“Liliu pedidu husi munisipál hanesan karreta multifunsaun no ambulansia hodi halo manutensaun ba karreta karik tenke atende urjente tamba ita haree katak saúde mós hanesan militár”, tenik Diretór Graciano ba Agência Tatoli, iha Sentru Saúde Gleno, tersa ne’e.

Nia informa, iha Servisu Munisipál Saúde Ermera iha karreta multifunsaun neen no husi karreta hirak ne’e kada Sentru Saúde hetan karreta ida no nomós ambulánsia rua atu halo atendimentu ba Munisípiu Ermera.

Graciano da Costa haktuir, iha tinan kotuk Ministériu Saúde fó apoiu karreta ida ba Sentru Saúde Ermera, maibé karreta seluk tuan hotu ona no presiza troka.

“Tuir loloos karreta hirak ne’e tama ona ba prosesu lelaun maibé prosesu maka sei la’o lentu tanba burokrasia, maibé pedidu ami kontinua hato’o ba Governu Sentrál atu halo ona planu maibé seidauk iha resposta”, nia akresenta.

Maski nune’e, nia rekoñese durante ne’e fasilidade ba Sentru Saúde Munisípiu Ermera sira sufisiente ona atu jere tuir rekursu ne’ebé mak iha.

“Agora daudaun ita-nia fasilidade sufisiente hodi bele jere tuir rekursu ne’ebé maka iha nune’e bele halo atendementu ba komunidade sira no funsionamentu servisu la’o hela ho di’ak”, Diretór ne’e subliña.

Nia refere uitoan atu tau atensaun ba volume serbisu pesoál saúde balun ho idade avansadu no atu tama reforma ona, presiza tau atensaun hodi bele tau iha planu nune’e hetan rekursu foun.

Servisu Munisipál Ermera ninia kobertura iha Sentru Saúde neen iha postu administrativu lima, inklui Sentru Saúde Internamentu Gleno.

Totál pesoál saúde iha Munisípiu Ermera hamutuk 150, kompostu médiku na’in-62, parteira 54 no infremeiru 34.

Enkuantu, pesoál saúde Sentru Saúde Gleno hamutuk na’in-36, Atsabe 22, Ermera 18, Hatulia 16, Letefoho 17, Railaco 19, Munisípiu Ermera 9, inklui bolseiru hamutuk 13.

Jornalista: Osória Marques

Editór: Xisto Freitas

HAKEREK NO HATÁN

Please enter your comment!
Please enter your name here