Administradór Postu Administrativu Letefoho, Julião Marito de Deus. Imajen Tatoli/António Gonçalves

ERMERA, 06 novembru 2019 (TATOLI) – Governu desde inísiu tau ona prioridade ba funsionamentu instituisaun Estadu nian ho preparativu sira atu implementa Polítika Desentralizasaun Administrativa no Podér Lokál, hodi estabelese munisípiu iha distritu 13 tuir saida maka define ona iha lei númeru 11/2009, 7 outubru.

Inisiativa ne’e tanba Governu konsidera Polítika Desentralizasaun Administrativa no Podér Lokál importante atu tulun dezenvolvimentu setór privadu iha área rurál hodi promove mós instituisaun Estadu sira atu sai forte liután, maski nune’e seidauk iha lejizlasaun atu suporta polítika ne’e.

Administradór Postu Administrativu Letefoho, Julião Marito de Deus, rekoñese bainhira laiha lejizlasaun, difikulta atu bele fó resposta ba preokupasaun povu, liuliu iha munisípiu no postu administrativu sira.

“Ami hanesan ezekutadór prontu atu kolabora no ezekuta orden saida de’it husi Governu Sentrál, atribui iha Munisípiu ka iha Postu Administrativu sira, maibé buat balun maka ami sei preokupa maka lei atu oinsá bele fó forsa ba nível munisípiu sira atu ita rasik bele foti desizaun balun”, nia tenik ba Agência Tatoli iha ninia knaar fatin, kuarta ne’e.

Nia hatutan: “Ami hein de’it Nai-ulun sira iha nível nasionál kuandu dehan ida ne’ebé maka atu implementa ami prontu atu halo tuir”.

Maski nune’e, Governu inisia ona Lei Podér Lokál no Lei Desentralizasaun Administrativu, maibé iha setembru 2017, Prezidente Repúblika, Francisco Guterres ‘Lú Olo’, veta ho razaun sei dúvida ho kontrolu Governu Sentrál ne’ebé bele lakon ba Administradór sira.

Administradór ne’e dehan, durante ne’e servisu administrasaun hasoru difikuldade tanba iha parte desizaun balun ne’ebé maka administradór sira labele foti.

“Ami husi postu ba munisípiu bele ezekuta serbisu tuir ami nia kompeténsia. Iha nível munisípiu iha setór sia maka sei hamutuk ho Estatál tanba ne’e maka ami ninia liña koordenasaun iha parte balun difísil loos atu bele foti desizaun no ida ne’e difikulta ami”, nia akresenta.

Nune’e mós nia dehan, haree ba tempu hirak liubá iha problema impase polítika iha rai laran, ne’ebé halo amprograma lubun ida maka labele la’o.

“Ezemplu ami husi postu iha orsamentu ne’ebé munisípiu prevee ona, maibé haree fali iha estrutura munisipál maka seidauk kompletu. Tanba ne’e difikulta ami iha parte rekursu umanu”, nia salienta.

Julião Marito esplika, daudaun ne’e ba projetu iha kategoria ho montante $5.000, autoridade sira iha kompeténsia maibé iha $5.000 ba leten tenke hetan autorizaun husi nível munisípiu ba nasionál, nune’e mós ba $10.000 ba leten tenke iha autorizasaun husi nasionál maka fó autorizasaun.

“Burokrasia bele halo han tempu to’o fulan. Tanba ne’e ita nia esperansa ba Governu maka lei tenke defini loloos atu ita bele hala’o serbisu ho di’ak”, nia subliña.

Parte seluk, Xefe Suku Lauana, Postu Administrativu Letefoho, Miguel Gomes Maia, konsidera liafuan desentralizasaun dehan “lori servisu besik mai komunidade”.

Xefe Suku Lauana, Postu Administrativu Letefoho, Miguel Gomes Maia. Imajen Tatoli/António Gonçalves

“Ami hanesan Xefe Suku uluk envolve ona iha pre-deskonsentrasaun no deskonsentrasaun mai to’o agora maibé tanba autoridade sira ladún book-aan, agora desentralizasaun ami rona dehan ami nia Prezidente Autoridade sira halo hela serbisu maibé ladún iha progresu”, autoridade suku ne’e dehan.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here