Prezidente Institutu Petróleu no Jeolojia, Hélio Casimiro Guterres. Imajen Tatoli/António Gonçalves

DILI, 5 novembru 2019 (TATOLI)—Prezidente Institutu Petróleu no Jeolojia (IPG-sigla portugés), Helio Casimiro Guterres, hateten Timor-Leste iha urániu.

“Timor-Leste iha urániu bazeia ba dadus laboratóriu. Ne’e mak ita kontinua halo estudu katak iha rai-leten ita hatene tiha ona. Institutu ko’alia ho dadus. Institutu la ko’alia ho ibun mamuk, tanba fatuk sira hotu ita halo teste”,  nia dehan ba jornalista sira, iha Parlamentu Nasionál, tersa ne’e.

Maski nune’e, nia dehan, urániu (produtu kímika) la importante ida, kuandu ema-nia nesesidade la ba to’o iha ne’ebá.

“Agora importante mak mina no gás. Kuandu ita ko’alia kona-ba urániu, balun hanoin ita atu halo bomba atómiku, lae. Depende ba nesesidade umanu”, hateten Helio Guterres.

Lee mós: Timor-Leste Bele iha Urániu

Nia afirma, oras ne’e mina sei iha, la presiza book urániu. IPJ identifika urániu bazeia mós ba mapa jeolojia. “Kualkér fatuk iha rai-leten ita halo estudu, fatuk ne’ebé iha rekursu minerál, entaun ita buka-tuir fatuk ne’e”, nia esplika.

Helio hatutan fatuk ida konsidera hanesan rekursu minerál sai hosi laboratóriu mak bele dehan fatuk ne’e urániu ka la’ós.

“Urániu ne’e Oé-Cusse iha, Suai iha, Ilimanu iha, maibé agora ema-nia nesesidade mak mina no gás”, nia tenik.

Antes ne’e, Prezidente Autoridade Nasionál Petróleu no Minerál (ANPM), Gualdinho da Silva, hateten Timor-Leste bele iha urániu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here