Ministra Finansa ein ezersísiu, Sara Lobo Brites, hamutuk ho Diretór Jerál Ministeriu Finansa, hala’o audiensia ho Komisaun C, D No E kona-ba OJE 2020. Imajen/TATOLI Egas Cristovao.

DILI, 05 novembru 2019 (TATOLI) – Diretora Unidade Parseria Públiku-Privada (UPPP) iha Ministériu Finansa, Sitalina Maria das Dores Amaral Tilman, hateten Estadu Timor-Leste liuhusi Governu hahú asina akordu empréstimu iha 2012 no  to’o 2019 ho Banku Mundiál, Banku Aziátiku Dezenvolvimentu (ADB, sigla Inglés) no Japan International Cooperation Agency (JICA) hamutuk millaun $457,51.

“Akordu empréstimu ita asina iha 2012 to’o 2018, Governu foti ona osan empréstimu hamutuk millaun $398,51 no aumenta empréstimu foun iha tinan ne’e (2019) hamutuk millaun $59 ne’e ita halo ona negosiasaun, maibé seidauk tama faze asina kontratu”,  Diretora UPPP ne’e afirma hodi responde pergunta bainhira hala’o audiénsia ho Komisaun E, C, D no F kona-ba Orsamentu Jerál Estadu (OJE) 2020 iha plenária Parlamentu Nasionál, segunda ne’e.

Sitalina Maria friza iha mós empréstimu millaun $750 ne’ebé Governu tau iha 2020 ne’e atu fasilita Governu halo negosiasaun ho banku sira, maibé la signifika katak empréstimu sira ne’e sei ezekuta hotu iha tinan oin.

“Estrada Maliana ba Tilomar ita foti millaun $78, Lautein bá Lospalos no Vikeke millaun $138 , Maubara bá Hatulia no Maliana bá Batugadé millaun $60, SAT cross nian mak millaun ita foti $350 no Municipality Water and Sanitation nia mak millaun $55 no mós Basic Education Station ita foti millaun $30”, katak.

Diretora salienta kona-ba nia balansu atuál ne’ebé ezekuta ona millaun $216,4 iha 2012 to’o 2019. “Banku tolu mak Estadu Timor-Leste empresta hanesan Banku Mundiál, Banku Dezenvolvimentu Aziátiku no JICA mak millaun $182, 11 ezekuta rasik husi janeiru to’o outubru tinan ne’e mak millaun $37,71 ou atubele dehan katak nia ezekusaun la’o ona ho porsentu 44”, informa.

Nia afirma osan inan prinsipál atuál husi ADB, Banku Mundiál no mós JICA ne’ebé Timor-Leste selu ona mak totál hamutuk millaun $4,50.

Estadu Timor-Leste mós asina ona akordu empréstimu ho Exim Bank of China iha 2015, hafoin submete ba Tribunál Konta, maibé hetan rejeisaun ho razaun asuntu soberania.

“Ita-nia Tribunál Konta rasik mak rejeita akordu empréstimu ne’e, mas ita-nia Governu liuhusi Ministériu Negósiu Estranjeiru no Kooperasaun hato’o ona pedidu ida ne’e ba parte Banku Exim nasaun china nian”, nia relata.

Entretantu, deputada membru Komisaun E asuntu infraestrutura, Anabela Sávio, husu mós ba Ministériu Finansa sobre totál empréstimu hira mak Estadu Timor-Leste iha no ezekuta hira ona.

“Ami hakarak hatene orsamentu emprestu ne’e totál hira ona no hira mak ita selu ona”, deputada pergunta.

Jornalista : Florencio Miranda Ximenes

Editora : Maria Auxiliadora

1 KOMENTÁRIU

Leave a Reply to Marcal dos Santos Pereira Cancel reply

Please enter your comment!
Please enter your name here