Prezidente TIMOR GAP, Francisco Monteiro. Imajen Tatoli/António Gonçalves.

DILI, 5 novembru 2019 (TATOLI)—Kompañia estatál Timor GAP propoin millaun $78.3 ba orsamentu jerál Estadu (OJE) 2020 nian.

“Totál orsamentu ne’ebé mak Timor GAP propoin hamutuk millaun $78.3 ho previzaun katak komersializasaun hosi downstream biznis nian”, Prezidente Timor GAP, ep, Francisco Monteiro, esplika liuhosi audiénsia ho Komisaun C no D iha plenária Parlamentu Nasionál, tersa ne’e.

Nia dehan, komersializasaun hosi downstream ne’e prevee millaun $1 resin.

Prezidente Timor GAP, ep, haklaken hosi orsamentu millaun $78.3 ne’e hanesan transferénsia no orsamentu ne’e sei aloka ba liu projetu Greater Sunrise nian foti liu %70 hosi orsamentu ida-ne’e.

“Ne’e sei halai ba apoiu negosiasaun projetu Greater Sunrise nian depois evaluasaun impaktu ambientál no dezenvolvimentu kapasidade ba projetu Greater Sunrise, liuliu LNG millaun $7.5 depois iha parte upstream Greater Sunrise nian aloka millaun $25, iha parte downstream nian ami aloka millaun $25, restu investimentu ba iha offshore nian millaun $1, onshore millaun $1”, hateten Prezidente Timor GAP.

Nune’e mós, bloku ida transfere hosi Joint Petroleum Development Area (JPDA) mai Timor-Leste nian hamutuk millaun 1. Entretantu, iha ezekusaun orsamentu 2019, Timor GAP nian atinje ona pursentu 82.

Francisco Monteiro hateten programa importante sira ne’ebé ezekuta ona iha 2019 nian mak partisipa iha prosesu negosiasaun Fronteira Marítima.

Programa seluk ne’ebé Timor GAP ezekuta iha parte onshore nian, Timor GAP hamutuk ho parseiru sira hanesan Timor Resources konsege finaliza análize nesesáriu hafoin estudu seizmiku ne’ebé hala’o tiha ona tinan kotuk hodi identifika poténsia ba área atu halo perfurasaun.

“Tinan ida-ne’e hamutuk ho Timor Resources hanesan Timor GAP nia operadór konsege identifika alvu lima iha Suai nian, tolu mak sai alvu sei fura uluk depois mak sei avansa ho rua seluk tan”, nia katak.

Monteiro esplika, programa importante ida mak projetu Tasi Mane, ne’ebé serbisu hamutuk ho Ministériu Obra Públika liuhosi Project Manager Unit (PMU) hodi mantein koordenasaun serbisu.

Nia hato’o katak sei fó kompensasaun ba rai liu ektare 100 ne’ebé afetadu ba projetu Suai Supply Base (SSB) iha tinan ida-ne’e.

Nune’e mós, refinaria nian iha semana kotuk konsege finaliza pagamentu liu ektare 300 rai nian no Beaço nian komesa halo identifikasaun rai ba propriedade nune’e tinan oin bele kompensa.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here