Diretor Servisu Municipal Apoio Sosial Desastre Naturais Gleno, Municipio Ermera,Antonio Bere do Rego.Imajen/Ozoria

ERMERA, 05 novembru 2019 (TATOLI) – Diretór Servisu Munisípiu Apoiu Sosiál Dezastre Naturál (SM-ASDN), António Bere do Rego, hateten dezastre hanesan problema ne’ebé mundu tomak preokupa tamba sempre akontese kada tinan, inklui iha Munisípiu Ermera ne’ebé afeta ba populasaun barak.

“Dadus ne’ebé maka ami foti hamutuk 757, kompostu hosi uma komunidade hamutuk 752, instituisaun (kapela no eskola) lima”, informa Diretór SM-ASDN ba Agência Tatoli iha edifísiu Solidaridade Sosiál Gleno, tersa ne’e.

Nia dehan, tuir dadus ne’ebé iha, ba vítima dezastre naturál iha Autoridade Munisípiu Ermera hosi outubru no novembru 2019, rejista iha Postu Administrativu Atsabe hamutuk 180, Letefoho 163, Ermera 61, Hatolia 394 no Railaco 21.

“Ami atende imediatamente ba fatin akontese dezastre naturál ne’ebé maka afeta ba uma hodi halo apoiu nesesidade báziku ba vítima. Hafoin sei halo verifikasaun dadus”, nia akresenta.

Diretór ne’e dehan, durante hala’o atividade sosiál ne’e hetan mós tulun husi parseiru sira hanesan Mercy Corps, Cruz Vermelha Timor-Leste (CVTL) no Diresaun Dezastre Naturál, nune’e konsege fó ona apoiu emerjénsia ba família hamutuk 307.

Tuir António Bere, família hamutuk 450 maka seidauk hetan apoiu emerjénsia tamba kondisaun estrada aat no laiha transporte hodi lori sasan to’o vítima sira.

Maske vítima balun seidauk hetan apoiu maibé diretór esklarese katak nia parte informa ona ba Autoridade Komunitária sira hodi mobiliza malu atu foti sasan apoiu dezaste iha armajen Servisu Munisipál nian.

“Dala ruma sira seidauk foti sasan tamba sira haree fali ba kuantidade sasan entaun ami dehan ba sira labele haree ba kuantidade maibé haree ba saida maka tuir Estadu ninia kbiit”, nia salienta.

Sasan apoiu ba vítima sira maka hanesan muskiteiru, biti, toalla, sabaun, lona, balde no mós ba ai-han maka foos, super mie, sardina lata, biskuit, bee hemu no bimoli

Jornalista: Osória Marques

Editór: Xisto Freitas

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here