Xefe Sentru Saúde Gleno, José de Carvalho Imajen Tatoli/António Gonçalves

ERMERA, 04 novembru 2019 (TATOLI)Xefe Sentru Saúde Gleno, José de Carvalho, informa daudaun ne’e sentru saúde iha de’it transporte ida, tanba ne’e pesoál saúde sira enfrenta problema falta transporte ba operasionál.

“Agora daudaun ami iha Sentru Saúde Gleno multi funsaun atu hala’o Programa Servisu Integradu Saúde Komunitária (SISCa) maibé karreta komesa aat ona, tanba ne’e lori ba hadi’a maibé seidauk di’ak to’o agora. Ami hein katak bainhira maka ramata halo manutensaun”, nia tenik ba Agência Tatoli iha Sentru Saúde Gleno, segunda ne’e.

Tuir nia, agora daudaun servisu munisipál sira halo ona desentralizasaun ba munisipál tanba ne’e sentru saúde hein koordenasaun ho Servisu Saúde Munisipál.

“Ami hein bainhira iha problema ruma maka ami relata, entaun ami hein hodi bele fó resposta. Ami nia ligasaun la ba direta iha sentrál tanba iha ligasaun ho servisu munisípiu”, nia akresenta.

Nia dehan, Gleno ho totál populasaun 103.169 (tuir sensu 2004), sentru saúde hakarak fó atendimentu ba komunidade ho planu ne’ebé iha ona.

“Ami iha alvu tinan ida ne’e nia laran, atu fó tratamentu saúde ba ema na’in-25.200 maibé ami mós atende prioriedade iha suku hitu. Maibé antes haree suku sira ne’e, ami mós atende suku iha Ermera ne’ebé besik hanesan Poetete, Talimoro, no seluk tan.

Nune’e mós, nu’udar Sentru Saúde Internamentu, populasaun balun mai hosi munisípiu viziñu Aileu hodi hetan atendimentu saúde.

Nia dehan tan, servisu sentrál sentru saúde iha ligasaun ho munisípiu de’it tanba ne’e difikulta bainhira iha problema urjente ne’ebé atu liga ho governu sentrál, liuliu iha reparasaun ba transporte sira.

“Dalaruma ba Dili demora tempu liu tanba burokrasia, liuliu transporte sira ne’ebé maka atu hadi’a iha nasionál nafatin iha burokrasia. Entaun transporte bele lori semana ida ka rua maka bele hetan rezultadu. Ida-ne’e bele impede atendimentu iha komunidade, liuliu Programa Vizita Saúde na família no SISCa”, nia subliña

José de Carvalho realsa, kuandu laiha karreta operasionál atu halo servisu iha sentru saúde laran bele la impede servisu tanba laiha movimentasaun, maibé programa hanesan Vizita Saúde na Família na família no SISCa presiza duni transporte.

Nia mós dehan, Sentru Saúde Gleno dalaruma mós falta ai-moruk.

“La’ós tanba laiha maibé derepente ai-moruk bele falta hanesan antibiótiku no antiperétiku dala ruma hotu iha fulan klaran. Maibé, ai moruk la falta iha tempu naruk”, nia salienta.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here