Ministra Finansa ein ezersísiu, Sara Lobo Brites, hamutuk ho Diretór Jerál Ministeriu Finansa, hala’o audiensia ho Komisaun C, D no E kona-ba OJE 2020. Imajen/TATOLI Egas Cristovao.

DILI, 05 novembru 2019 (TATOLI) – Ministra Finansa ein funsaun, Sara Lobo Brites, informa liuhusi estudu ne’ebé hala’o ona husi Banku Sentrál Timor-Leste (BSTL) hatudu katak seidauk oportunu atu prodús moeda rasik hodi halakon dólar amerikanu iha Timor-Leste.

“Atu emite moeda rasik ne’e buat ida ke ita presiza halo peskiza didi’ak no presiza konxiénsia husi ema hotu-hotu atu haree katak to’o tempu ona ka lae atu emite moeda tanba rezultadu husi peskiza emite ita-nia moeda rasik sei simu vantajen ida negativu”, Sara Lobo deklara kestaun ne’e hodi hatán ba preokupasaun deputadu sira-nia atu kria ona moeda rasik, iha plenária Parlamentu Nasionál, segunda ne’e.

Atuál Vise-Ministra Finansa ne’e dehan International Monetary Fund (IMF) ninia avaliasaun halo tinan-tinan katak nasaun ne’ebé de’it uza dólar Amérika ne’e serve no fó vantajen ekonómiku tebes.

“Bazeia ba article for IMF nian halo tinan-tinan mós informa katak ate a data desizaun ne’ebé ita opta dólar Amérika hanesan ita-nia moeda ne’e serve nafatin ita-nia situasaun no fó vantajen ba ita”, katak.

Nia salienta dahuluk bele haree de’it Timor-Leste nia balansu barómetru importasaun boot liu esportasaun. “Ne’ebé dehan ita iha moeda rasik ne’e, ita sei sosa ema nia moeda liu fali moeda ita-nia, ne’e vantajen ida negativu tiha ona”.

Nune’e, Sara Lobo afirma iha rai balun ne’ebé sira iha moeda rasik, maibé ba uzu lokál de’it ba merkadu doméstiku no lori osan bá li’ur tenke konverte fali ba moeda seluk ho folin karun liu.

Entretantu, Deputada Bankada PLP no Vise-Prezidente Parlamentu Nasionál, Maria Angelina Sarmento, husu atu Governu Timor-Leste bele prodús moeda rasik atu labele depende ba moeda nasaun seluk.

“Oinsá ita-nia polítika kona-ba moeda? Agora daudaun ita sei uza dólar amerikanu, ita bele iha, mas kuandu ita uza nafatin ema nia moeda ne’e ema seluk mak regula merkadu de asaun, di’ak liu ita iha polítika rasik sobre moeda atu ita bele iha podér ekonómiku rasik”, nia sujere.

Deputadu Bankada FRETILIN, Marito Mota, hatete presiza duni Estadu Timor-Leste hanoin atu prodús moeda rasik atubele fasilita merkadu doméstiku iha Timor-Leste.

Sobre moeda rasik BSTL introdús uluk ona koin sentavu ida, lima, sanulu, 25, 50 no 100 no sentavu 200 ne’ebé ekivale ho dólar rua.

Governadór BSTL, Abraão de Vasconcelos, antes ne’e mós hatete atu Timor-Leste bele iha moeda nasionál sai hanesan kestaun ida iha ajenda BSTL nian tanba ida ne’e obrigasaun estatutáriu ne’ebé mak nia mandatu espesífiku atu haree asuntu ida ne’e hanesan no daudaun iha hela prosesu estudu nian.

“Mas Banku Sentrál la’ós hanesan lalais (terburu-buru) iha asuntu ida ne’e tanba kestaun ida moeda nasionál la’ós kestaun ida hanesan ita aprezenta estudu ida, ita debate lalais de’it pois ita hanoin dehan ita tenke iha osan rasik. La’ós tanba ita-nia viziñu ka ita-nia maluk balun iha rai-dook iha osan, ita mós tenke iha osan tanba iha sirkunstánsia hanesan ita-nia mezmu iha mundu agora, osan rasik ne’e la nesesáriamente reprezenta identidade ka independénsia país ida ne’e nian”, Abraão hatete iha Novu Turizmu (9/02/2018).

Hodi hatutan nasaun barak iha mundu ne’ebé soe tiha identidade ida ne’e hanesan Uniaun Europeia ne’ebé ezatamente sai ezemplu konkretu katak sira ne’ebé uluk iha moeda rasik sira soe tiha no deside adota moeda komún ida.

“Ha’u lahatene Timor-Leste labele iha mas ita presiza fó rekursu sufisiente, halo estudu sufisiente, debate asuntu ida ne’e sufisiente para ita entende loos ita atu hakat bá iha diresaun ida ne’ebá karik saida mak ita atu enfrenta, ninia vantajen no dezvantajen ne’e saida, nia poténsia mak ida ne’ebé loos? Ita tenke entende buat sira hanesan ne’e tanba implikasaun ne’e la’ós hanesan ki’ikoan tanba nota iha país sira”.

Tanba ne’e importante tebes mak bainhira Timor-Leste iha moeda rasik, polítika saida mak introdús mak polítika monetária.

“Sirkunstánsia situasaun hanesan agora iha Timor-Leste, karik sé mak iha ne’e hanoin dehan polítika monetária atu efetivu, ne’e kestaun ida Banku Sentrál tau atensaun séria tebes. Tanba ne’e mak prioritiza programa seluk hanesan modernizasaun ita-nia sistema pagamentu, mellora merkadu kréditu iha Timór tanba kestaun sira hanesan ne’e mak pre-kondisaun atu halo polítika monetáriu ida sai efetivu”.

Mezmu BSTL hetan mandatu husi Parlamentu Nasionál atu haree asuntu ida ne’e mas ne’e la’ós direitu eskluzivu ida ne’ebé mak hela de’it iha BSTL, maibé sidadaun hotu tenke rona desizaun hanesan ne’e afeta barak liu iha parte ida ne’ebé, grupu negósiu ka sosiedade atu entende para estrutura aproximasaun la’o estruturadu.

Notísia relevante : Timor-Leste Seidauk Bele Produs Osan-Tahan

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here