Diretór Jerál Peska MAP, Acacio Guterres. Imajen TATOLI/Egas Cristóvão

DILI, 05 novembru 2019 (TATOLI) – Diretór Jerál Peska Ministériu Agrikultura no Peska (MAP), Acácio Guterres, hateten to’o agora seidauk iha kompañia foun mak hakail ikan iha tasi-mane hafoin kompañia Hong Long husi Xina hetan problema.

Maibé daudaun ne’e, empreza estranjeira 10 maka hatama ona dokumentu ba Ministériu Agrikultura no Peska atu kaer ikan iha tasi-mane.

“Dezde kompañia (Hong Long) ne’e hetan problema seidauk iha kompañia seluk hodi substitui, maibé daudaun ne’e empreza internasionál hamutuk 10 maka hatama ona pedidu no hala’o ona reuniaun ho MAP, maibé to’o ohin loron seidauk iha solusaun”, haktuir Acácio Guterres ba Tatoli via telefone, ohin.

Nune’e, prosesu ba kompañia 10 ne’ebé hatama ona dokumentu ba MAP sira tenke estabelese sira-nia kompañia iha Timór, rejistu empreza no ikus liu maka tenke halo pedidu hodi hatama ró. “Prosesu ne’e maka hosi na’in-10 ne’e seidauk halo”, afirma.

Diretór Jerál ne’e relata iha 2016, Governu liuhosi MAP fó autorizasaun ba kompañia Hong Long atu kaer ikan iha área tasi-mane tuir prosedimentu legál liuliu relasaun ho dekretu lei númeru 4/2004 no mós dekretu Governu 6/2004, fó lisensa ba empreza refere hatama pedidu ba ministru momentu ne’ebá no fó autorizasaun hatama ró no selu taxa ba Governu.

“Sira selu taxa tinan ida, maibé to’o dalan klaran iha ona kazu entaun sira la kontinua, osan ne’e tama ba kofre Estadu, maske kazu ne’e iha ona desizaun hosi tribunal, maibé to’o agora seidauk iha desizaun atu sira kontinua ka lae”, katak.

Governu fó lisensa ba empreza internasionál Hong Long kaer ikan iha tasi-mane iha novembru 2016, maibé iha jullu 2017 hetan kazu nune’e la kontinua tanba deskobre halo peksa ba tubaraun iha tasi-mane.

Ró Hong Long ne’ebé hakail ikan iha tasi-mane iha momentu ne’ebá ne’e hamutuk 15 no selu taxa ba kofre Estadu rihun $429.

“Dezde empreza Hong Long hasoru problema ami iha alternativa rua, ida maka hein parseiru sira para hatama kontratu no Governu halo análize hodi nune’e bele autoriza para fó lisensa, alternativa seluk maka ita-nia Governu rasik foin daudauk liuhosi orsamentu 2020, ita-nia Primeiru-Ministru orienta para sosa ró rasik no timoroan ne’ebé iha talentu atu kaer ikan entaun ita tenta para iha 2020 sosa ró rasik no timoroan sira maka kaer”, dehan Acácio.

Relasiona ba orientasaun Primeiru-Ministru, diretór ne’e dehan daudaun sira prepara hela planu, karik orsamentu ne’e aprova sei treina ema no se kompañia balu atu mai kaer ikan sei envolve timoroan sira para hetan esperiénsia. Bainhira Governu rasik sosa ona ró mak timoroan sira sei uza hodi kaer ikan.

 “Maibé orsamentu ne’e la’ós tau iha MAP, más Prezidénsia Konsellu Ministru nia okos no sira maka organiza, ami hatene maka tékniku de’it. Karik sosa ró lima ho folin rihun $15, no ró tolu entaun ho valór rihun $22”.

Notísia relevante : 2020, Governu Planeia Sosa Ró Peska Unidade Tolu

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here