Diretór Jerál Peska Ministériu Agrikultura no Peska, Acácio Guterres. Imjaen/Espesiál.

DILI, 05 novembru 2019 (TATOLI) – Diretór Jéral Peska Ministériu Agrikultura no Peska (MAP), Acácio Guterres, hatete atu halo dezenvolvimentu iha indústria peska, problema mak seidauk iha infraestrutur bázika liuliu ró.

“Atu halo dezenvolvimentu iha indústria peska problema boot maka to’o ohin loron ita seidauk iha infraestrutura bázika, liuliu hanesan ró maka sai preukupasaun boot ba ita para oinsá asegura ró sira tama ilegál hodi kaer ita-nia ikan, no kuandu iha ona ró, inspétor sira fásil atu kontrola ikan, no daudaun ne’e ita seidauk iha ró própriu para to’o iha tasi-mane”, Acácio Guterres ba Tatoli via telemovel, ohin.

Nune’e nia dehan, durante iha 2018 hahú hosi janeiru to’o dezembru ró ilegal tama iha tasi mane hamutuk 107 no tuir dadus diresaun jerál peska ikan tonelada 236.449 mak lakon no konverte ba osan biliaun $1.1.

“No iha tinan 2019 hahú hosi janeiru to’o outubru detata ró unidade 63 maka kaer ikan ho ilegalmente iha tasi-mane no kompara ba osan milaun $400-resin. To’o oras ne’e seidauk bele deklara sai katak ró hirak ne’e hosi ne’ebé?”, Diretór Jerál ne’e haktenik.

Nia hatutan atu kontrola peska ilegal sira ne’e, MAP sempre halo kooperasaun ho parte defeza no seguransa hanesan Polísia Nasionál Timor-Leste (PNTL), Unidade Polísia Marítima (UPM) ho FALINTIL-Forsa Defeza Timor-Leste (F-FDTL), Komponente Navál.

“Ami sempre partilla informasaun sira ne’e ba ministériu relevante liuliu Komponente Navál no Polísia Marítima oinsá hodi bá kontrola, maibé tanba ita-nia meiu ne’e maka la sufisiente atu to’o iha ne’ebá, ne’ebé hein katak kooperasaun ho Austrália ne’ebé oras ne’e daudauk halo konstrusaun ró iha Austrália no iha 2023 atu entrega mai Timor-Leste, ida ne’e di’ak liu para ita bele kontrola di’ak liután tasi parte súl Timór ninian”.

Acácio salienta atu evita ró ilegál maka Timor-Leste tenke iha ró rasik ho kapasidade hodi kontrola to’o iha kosta súl tanba tasi mós luan.

“Nune’e bele kontrola di’ak liután ita-nia tasi, tanba la’ós de’it akontese peska ilegál, más bele akontese krime oioin hanesan, arma ilegal, droga, tráfiku umanu, tanba ami iha esperiénsia hodi fó lisensa kaer iha ne’ebá, kuandu problema iha tasi-laran sira sona ita-nia ema depois sira mós hatudu kilat, ne’ebé tenke servisu integradu ho seguransa no defeza para kontrola”, katak.

Nune’e, liuhusi orsamentu Estadu 2020, ho orientasaun Primeiru-Ministru nian para Timor-Leste sosa ró rasik maka MAP daudaun prepara hela planu bainhira orsamentu aprova sei treinu timoroan ne’ebé iha talentu ba área peska nian no karik iha kompañia balun atu mai kaer ikan sei envolve timoroan para hetan esperiénsia. Bainhira Governu sosa ona ró maka timoroan sira sei uza rasik hodi kaer ikan.

Orsamentu ne’ebé atu sosa ró ne’e tau iha verba Prezidénsia Konsellu Ministru nian no bainhira sosa ró lima ho folin rihun $15 no ró tolu ho valór rihun $22.

Notísia relevante : Peska Ilegál Prejudika TL Lakon Biliaun Ida Resin

Peska Ilegál Komesa Redús Kompara ho Tinan Kotuk

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here